Dit es Stichting Lambieck Knoup Wieërt

Waat es de Lambieck Knoup?

De Stichting Lambieck Knoup Wieërt és opgerichtj in 1979. De Lambieck Knoup prizzentieërtj jaorliks oppe maondjigaovendj vuuër de vastelaovendj tiêdes de Lambieckaovendj de 11 meist ludieke vuuërvalle van ’t vuuërgaondje jaor. ’t Gieët dan um gebuuërtenisse di-j in ieërste instântie serieus zeen bedoeldj mer op ’n ongeplendj hilariese wieze uutpakke.
De meist spraokmakendje missers waere bekroeëndj mét de Gouwe, Zulvere en Broonze Lambieck. De Lambieck Knoup buigtj zich jaorliks oeëver zoeë’n 40 tot 50 missers en blunders di-j zich in ‘t vuuërgaondje jaor inne gemeindje Wieërt en Ni-jwieërt hebbe aafgespuuëldj. D’r moog geîne opzét in ’t spuuël zeen. En zieëker zoeë belangriêk: de betrokkene motte d’r achteraaf ouch zelf hertelik mét kunne lache. Zelfspot en ‘nen houp humor spuuële heejbeej ’n belangriêke rol. Ouch reiktj de Lambieck Knoup vanaaf 1990 bekans jaorliks ’ne Ieëre-Lambieck uut. Dieës óngerschei-jing wurtj uutgereiktj vör ‘ne blunder dae zich boete Wieërt en Ni-jwieërt hieët aafgespuuëldj, mer waal inne provincie Limburg. Det moog en kân zoeëwaal Bêls as Nederlands Limburg zeen. Tot slot zette ve jaorliks emes in ’t zunke dae zich songer einig belang en oppe achtergroond inzétj vör de Wieërter samelaeving en cultuur. Dieëze persoeën kriegtj vör âl zien of heur verdeenste de Jan van der Croeën-Ieëremedalie. De waopespreuk van de Knoup és:

“Aliquando et Insanire, Jucundum est.”

(‘t És bést lollig um ’ne kieër ‘t kaof te zeen)

Dit zeen vae

Wi-j és de Stichting Lambieck Knoup Wieërt ontstânge?

Beej de jaorlikse algemein politieke beschawwing inne Wieërter gemeindjeraod in 1978, opperdje ’t raodslid René Verheggen ’t idee um in Wieërt ’ne mediapriês in ’t laeve te rope. De media in oeës Wieërter Lând bestoonge in dae tiêd allein uut De Limburger, ’t Kanton Wieërt, ’t Lând van Wieërt en Op de Keper. Mét veer gegadigdje di-j de priês in de wacht koste sleîpe, woort ’t idee nao ’t lând der fabele gesteurdj. De pörspriês kwoom d’r dan ouch neet, of toch waal? Want neet lang daonao dieëj zich ’t onvuuërstelbare schandaal vuuër det ’n ânger belangriêke Wieërter gezét, de Rogstaekersgezét, uut de verkoup gehaaldj mós waere. Dit woor ‘n naodrökkelike eis van ‘t Wieërter Mannekoeër. In di-j kôldergezét stóng namelik e mupke det beej ‘t Wieërter Mannekoeër in ‘t verkieërdje kaelsgaat geschoeëte woor. Heejop dreigdje ‘t Wieërter Mannekoeër eur mejwêrking aanne Boonte Aovendje te stoppe als de Rogstaekersgezét neet uut de verkoup woort gehaaldj. Toenmalig Vorst Jan Coenen kos weinig ângers doon as towgaeve en dus woort de Rogstaekersgezét uut de umloup gehaaldj. Dieës gebuuërtenis bracht de redaksie vanne Jan van der Croeëngezét, di-j jaorliks doeër waekblaad Op de Keper woort uutgebrachtj, op ‘n idee. Det idee kwoom uut de koeëker van Fun van den Berg en teîkenaar Sjaak de Groeët, di-j same ‘t hert van dieës redactie vormdje. Ouch Jan Nijs en Mia Post leverdje ’n beejdraag aan dieës vastelaovendjgezét: Geine priês vör de media, wi-j René Verheggen haaj geopperdj, mer ‘ne priês vanne media vör de groeëtste blunder van det jaor. De Gouwe Lambieck waas geboeëre. De ieërste Gouwe Lambieck woor vör ‘t Wieërter Mannekoeër. De uutreiking vong plaats inne raodszaal van ‘t aod stadhoês aanne Mêrrentj, zjuust vuuër de installatie van Rogstaekersprîns Frans Knapen.

De naam Lambieck Knoup

Wi-j és de naam tot stând gekaome? Lambieck és aafgelédj van Lambik, uut de strip van Suske en Wiske. Lambik és de personifikasie van e bitje ‘n sullig figuur en ‘ne goodmeuj-ige flaris. Daomej wurtj óngerstreeptj det de winnaars vanne Gouwe Lambieck heej kwa streêk êrg op kunne liêke. Mét ‘t 11-jaorig bestaon in ’t vuuëruutzicht kwome de lede tot de konklusie det de Lambieck noow ouch ’ne officieële status mós kriêge. Vanaaf det memênt hantieëre ve de naam Lambieck Knoup. Heejbeej stieët ‘Knoup’ vör ‘t samebrînge (samenknuîpe van minse) en ‘t ontraofele van vrieëmdje vuuërvalle. De Lambieck Knoup woort vanaaf det memênt ’n volwaardige Stichting.

Doel van Stichting Lambieck Knoup Wieërt

Stichting Lambieck Knoup hieët as doelstélling ’t jaorliks towkinne vanne Gouwe, Zulvere en Broonze Lambieck en ‘t organizieëre van activiteite ter óngerstuuëning vanne sociaal en cultureel activiteite in Wieërt. Doeër de jaore haer mochte o.a. ‘t missiecomité, de Martinus Stichting, ‘t Maartenshoês, ‘t Zeêkenhoês, Stichting Martinus Monument Wieërt en de organisasie van ‘t Jeugdpreensetreffe ‘n donasie ontvânge.

Aktiviteite vanne Lambieck Knoup

Naeve ’t organizieëre vanne Lambieckaovendj mét oonger ângere de uutreiking vanne Gouwe, Zulvere en Broonze Lambieck vör de drej stomste streêk uut Wieërt en umgaeving, zeen d’r doeër de jaore haer mieër aktiviteite georganizieërdj. Dieës ânger aktiviteite móste gêldj inne laaj brînge um donasies aan sociaal kultureel instéllinge te kunne schînke. Zoeë organisieërdje de Lambieck vanaaf 1980 jaorenlânk ’n Fotoportrettegaleri-j. Op groeët formaat woorte vastelaovendjfoto’s van ’t vuuërgaondje sezoên via ‘n veiling op asgoonsdig per opbod verkochtj vör het gooje doel. In âl di-j jaore hebbe fotograve wi-j Cor Damhuis, Jacques Vanderfeesten, Ad Meeuwis, Piet Cardinaal en Jan Knapen belangeloos mejgewêrktj aan dit project. As vervolg oppe Fotoportrettegaleri-j begoste ve mét de Netste Pekskes Sjoow in 1999. ‘n Kolderieke modesjoow vör edereîn dae zelf zien vastelaovendjpekske maakdje. Tiêdes ’t vastelaovendjsezoên zochte Knouplede nao de genominieërdje vör ‘t jaor d’rop. Mét de mejdaeling ‘De Knoup és op uch gevalle’ woorte minse verzochtj eur kreasie nog ‘ne kieër oppe katteloup vanne Poort van Limburg te toeëne. Dieës sjoow woort veer jaor georganizieërdj. Indj 2003 woort ’t Börgemeîster-projekt opgestartj, mét as inzét: Weem wurtj de nowwe Börgemeîster van Wieërt in 2006? Doel van ‘t projekt woor um ‘n aantal bekindje Wieërtenare vuuër te drage as Börgemeister. Dieës Wieërtenare vertoeëndje belangeloos eur schilderkûnste. Vervolges woorte de artistieke beejdrage doeër de Lambieck Knoup per opbod verkochtj en ging de opbringst van dit projekt nao de Stichting Martinusmonument. Wieter hieët de Lambieck ‘ne rommelmêrrentj georganizieërdj en ouch jaorelânk kienaovendje in ’t Buurtcentrum op Moêzel verzörgdj. Vanaaf 2010 bringtj de Knoup eder jaor e pinke in umloup woeë-op eîn vanne lede vanne Lambieck in ‘n karikatuur stieët aafgebieëldj. Tieëge betaling van 2 euro tiêdes de Lambieckaovendj, kriegdjae ‘n uniek exemplaar in hang want de oplaag es bepêrktj. In 2012 hebbe ve ter ieëre van oeës 3 x 11 jaor jubileum e book uutgebrachtj woeëvan de opbringst ouch nao e good doel gieët.

ÓNGERSCHEÎ-JINGE VANNE LAMBIECK KNOUP

De Lambieck Knoup kintj naeve de Gouwe, Zulvere en Broonze Lambieck nog ’n aantal óngerscheî-jinge tow. Naeve de ‘Jan van der Croeën-medalie’ kinne ve ouch ‘t ‘Paarlemoere Knuîpke’ tow.

(Lînks ‘t nowe “Paarlemoere Knuîpke” in gebroeëk vanaaf 2015)

´T Paarlemoere-Knuipke

’t Paarlemoere Knuîpke és ingeveurdj doeër de Lambieck Knoup beej de veering van ‘t 1 x 11 jaorig bestaon

De Stichting Lambieck Knoup Wieërt hieët völ te dânke aan minse di-j zich vör de Lambieck Knoup, op welke meneer dan ouch, inzétte. Dieës minse hêlpe os soonger belang beej ’t organizieëre van zoeëwaal intern as extern aktiviteite woeëvör de Lambieck Knoup gevraogdj wurtj. Vör dieës persoeëne di-j vae e wêrm hert towdrage, reike vae ’t Paarlemoere Knuîpke uut, as bliêk van dânk en waardieëring vör eur beejdrage en gooj zörg.

Dhr. en Mevr. Cor en Nelly Frenken
Dhr. Frans Kohl
Dhr. en Mevr. Wiel en Annie Tindemans
Dhr. Thei Lenders
Dhr. Jac de Leeuw
Dhr. Sjra Wijen
Dhr. Hennie Houben
Dhr. Wim Komhoff
Mevr. Marie Morees-Fyen
Mevr. Nelly Wijnen
Dhr. Peter-Paul Donkers
Dhr. Peter Beelen
Mevr. Fien Tindemans
Mevr. Leidy Moonen
Mevr. Anja van de Berg
Dhr. Piet Cardinaal
Dhr. Ruud Kunnen
Mevr. Maria Tinnemans
Mevr. Truus Bostelaar-Driessen
Dhr. Laury Tinnemans
Mevr. Karin van Nieuwenhoven
Mevr. Tinnemans–Niën
Dhr. Jan Knapen
Dhr. Bert Nelissen
Dhr. en Mevr. Hamaekers
Dhr. Eric van de Kerkhof
Mevr. Irma Hopkoper
Dhr. Peter van Akkerveken
Dhr. Pierre Geelen
Mevr. Leny Geelen-Nouwen
Mevr. Jessica Vensselaar
Dhr. Rob Corsten
Dhr. Jos Schols
Dhr. Fred Hoogkamer
Dhr. Jac Moonen
Mevr. Nicole Moonen
Mevr. Monique Van den Boogaert - Verhees
Dhr. Paul Brils

De Patronus Civilis

De ‘Patronus Civilis’ és ‘n ieëre-óngerscheî-jing di-j doeër de Lambieck Knoup wurtj uutgereiktj. ‘Patronus Civilis’ beteîkentj létterlik ‘wereldlijke beschermheer’. De beschermhieër vervöltj ieëre-take di-j uut respect aan dieëze persoeën towgewieëze waere..

Doeër de jaore haer és de ‘Patronus Civilis’ uitgereiktj aan:

Dhr. Sjra Wijen