Jan van der Croeën-Ieëremedalie 2024

Lennart Stultiens

De jubilieërendje Lambieck Knoup hieëf op de Daag van de Vreejwilliger bekindj gemaaktj weem de Jan van der Croeën-ieëremedalie in 2024 in ontvangst moog neme. Neet ieërder inne Knoup-geschiedenis kwoom ´t veur det zoeëwaal vader (2020) as zoeën (2024) dieës ieër te beurt veel.

Jan van der Croeëndrager 2024 és

Lennart Stultiens

´nne mins dae zich op verschillendje terreine verdeenstelik hieëf gemaaktj vör de Wieërter samenlaeving.

Zoeë waas hae van 2010 tot 2014 bestuursvuuërzitter vanne Stichting Volley Promotion Weert / Imato VC Weert. Daonaeve maaktje hae zich verdeenstelik vör ongernemers. In 2013 waas hae medeoprichter van Jonge Ongernemers Wieërt, woeë hae tot 2016 auch bestuurslid woor. In 2015 hieëf hae Stichting de Verbinderij opgerichtj, woeë Perron C auch és ontstange. Dieës stichting ongersteuntj startendje ongernemers onger mieër in betaalbare en inspirerendje hoeësvesting.

Vastelaovendjveerders kinne ´m als Rogstaekerspreens 2014, dae vanaaf 2017 de vuuërzittershamer vanne Aod-Rogstaekers-Preenseclub in hang hieëf. Daonaeve hieëf hae zich van 2017 tot 2022 ingezatte binne de Wieërter politiek vör de VVD.

Vanaaf 2014 és hae in verschillendje rollen, woeë onger bestuurslid en vuuërzitter, actief betrokke beej de Ronde Taofel 146. Naeve groeëte Taofel-projecte, waas hae ńne kèrtrekker van ´t Beer, Food & Friends Festival vör ´t gooje doel (2017) en hieëf hae auch in de coronaperiode aete roondgebrachtj nao seniore (2022).

Vanaaf 2021 és hae 1 van de initiatiefnemers van de Stichting Weert Doneert, die benefiet activiteite organisieërtj woeëbeej onger angere de Wieërter horecaongernemers en vastelaovendjvereinigingen tieëdes de coronaperiode un hert onger de reem woort gestooke.

En dan hieëf hae zich nog as kèrtrekker, organisator of initiatiefnemer verdeenstelik gemaakt vör:

– Het 75-jaorig jubileum van L.T.C. De Ray-Prickers
– Het project ‘Wages Kieëke’ in samenwerking met Heldj op Zök (2020) toen de vastelaovendjoptocht neet door kos gaon.
– Het project ‘Raodsleden helpe de horeca un hèndje’ (2022).

Hae waas tieëdes de coronaperiode contactpersoeën vör un app-groep van vreejwilligers die vör ´t St. Jans Gasthoeës opgetrommeldj koste waere as d´r snel iets geregeldj most waere, zoeë as ´t opbouwe van de triagetent en ´t aanbreenge van faciliteiten zoeëdet ´t personieël kos oeëvernachte.

Tot slot és hae betrokke gewaesj beej ‘GO ! Battle’ van Gilde Opleidingen woeëbeej hae aafstudieërprojecten vör gooj doelen hieëf begeleidj. Al met al genog reden um Lennart te huldjige as Jan van der Croeën 2024. De uitreiking van dieës ieëre-medalie zal tieëdes ´t Lambieckmatinee op zoondag 3 mieërt inne Soos gaan plaatsveenge.