Jan van der Croeën-Ieëremedalie 2019

JvdC2018 2

Henk en Anton Moonen

Tieëdes de 40ste Lambieckaovendj op zaoterdig 24 november és Jan van der Croeën-Ieëremedalie uutgereiktj aan

Henk en Anton Moonen

De breurs Moonen zeen lid van V.V. De Geknâkdje Stieël, ‘n vereiniging di-j al mieër as 22 jaor mej drejt inne Wieërter vastelaovendj waereldj. Anton luiptj ‘n kleine 40 jaor de optocht, en Henk bekans 30 jaor. Op vastelaovendjdeensdig zeen ze al 24 jaor presènt beej de Slaag um de Knaûwel, waat oeëts és begosj as ´t Toet- en Blaosfieëst.

Mer ouch oppe Boonte Aovendj vanne Rogstaekers hebbe de breurs zich verdeenstelik gemaaktj, Anton hieëf 33 jaor zieën steinke beej gedraage as Bonte Aovendj Artiest. Henk és acht jaor productieleider gewaesj vanne dieës aovendje. Same hebbe ze ouch jaorliks mej gedaon aanne oeëpening vanne vastelaovendj, op zaoterdigaovendj ut binnehaale vanne Rog. Tieëdes ’t boorebâl van 2004 woor Anton broeëdegom en Henk getuuëge. In ´t vastelaovendjsezoen van 2010 ging Henk as Rogstaekerspreens en Anton as adjudant vuuërop in dit spektakel.

Wieëter hebbe vae de Moonen-breurs ouch kunne zeen optrejje tieëdes de Roggy-musical, de Rogstaekers-operette en inne Rogstaekerslegende en schrieëve ze eeder jaor ’n slûm stök vör inne vastelaovundjgezèt.

V.V. de Geknakdje Stieël lutj zich altieëd zeen beej ’n reseptie, ’n fieëst, ’n jubilieërendje vastelaovendjvereiniging of kepèl um ‘n beejpassend kedoo te oeëverhandige.

De Wieërter vastelaovendj és ôngerdeil vanne Wieërter cultuur. Vör de Knoup dus alle reeje um Anton en Henk te beneume as Jan van der Croeën draagers 2019.