Tieëdes de oeëpening van ´t OLS 2024 in Doonder wurdj d´r een vaandelparade gehaoje. Van te veure zeen heej een aantal schuttereeje vör gevroagdj: zoeë ouch de schuttereej Sint Sebastianus uut Herkenbosch.

De jonges Koen en Dylan gaon vör dieës schoeën vereiniging de vlagk hijse. De manne woore duudelik. Onger gein beding gaon vae de Belse vlag hijse: ´t és de Limburgse vlag of geine!

´t chauvinisme ligtj d´r dik boeëve op. Fier en gruuëts asse zeen wurdj nog ffkes geoeëfendj met de protecolle van ´t vlagk hijse. ´t woord zoeë dék geoeëfendj det hun boks optrekke nao ´t toiettieëre met völ elegansie en bravoure gebuuërdje.

Op nao ´t OLS in Doonder. De manne haaje d´r zin in! Ze staon oppe plaats rust, nou… rust, ´t woor mier gezoonde spanning. Op commando klikke ze de vlagk aan en beginne met hijse. De vlagk keumptj met volle glorie tot zien recht inne weendj. Gae huuërdj de nachtegaaltjes in ´t eikenhout en de lieëuwerikskes kwettere d´r vrolik op los.

Schoeën klapperdj de vlagk inne volle bries en ´t gekwetter wurdj geroezemoes. Waat blieëktj, de manne haaje de vlagk aan de foute kant umhoeëg geheese en now hing dieës Limburgse vlagk oppe kop op ´t moment supreme.

Gelökkig noome Koen en Dylan dit laconiek . En gruuëts zoeë wieë ´t huuërdj  hebbe ze onger luid applaus de welverdeendje ieëre-lambieck 2024 in ontvangst genoome.

Van hèrte gefillisitieërdj!