Winnaars Gouwe Zulvere en Broonze Lambieck 2022

GOUD

Mary Smeets

Vae schrieëve juni 2021. Nederland heef zich eindelik weer és geplaatsj vör un belangriek voetbaltoernooi. Um oeës joongens een werm hert tow te draage en aan te moedigen tieëdes het EK besloeëtj Mary um heur hieële balkon te veurzeen van oranje vlegskes. Dit deut ze op unne nogal weendjerige, mer druuëge middig.
 
As Mary heur balkon umgetoverdj heef tot een oranje paradieës, met vlegskes en slingers en anger toeters en belle, wiltj ze trök nao binne gaon. Zjuust op det moment huurtj ze unne knal en weijtj de balkondeur met unne groeëte slaag tow. Shit, dinktj Mary en now? Hieël d´r naegel hieef ze verkwanseld doeer, zonder resultaat helaas, wi-j unne gek aan di-j deur te trekke en te sjorre. Mer helaas, de deur goof niks mej, en Mary haaj bekans gein naegel meer oeever.
 
Huub, de mins van Mary, woor net de hoond uut laote. Dus auch dae kos ze neet roope. En daobeej, as Huub waal op de bank haaj gezaete haaj dae niks gehuuërdj want nao een jaor of 40 zeen inmiddels alle kozieene veurzeen van dubbellaogs HR++ glaas. Huub woor erges achter hun hoeës op het graasveldj de hoond uut aan het laote. Wieët kosse neet zeen, want Moos, unne groeëte broeëne labrador leep mank.
 
Mary dinkt, jeh waat mot ich now doon? Zal ich dan mer van het balkon aaf klumme? Ze waas zich aan ’t bedeenke wi-j ze det dan ging doon, toen zjuust op det de buurvraw van e paar deur wieëter thoees kwoom van ’t werruk. Mary kintj ze eigelik neet echt, want ze woeëne d´r pas een paar jaor mer ze dacht, dieës vraw és mien redding. HALLO HALLO ruptj ze op de vraw. Ze kiektj umhoeëg en Mary begint te zweije en zweije en ruptj kom es ff heej.“Miene mins luiptj heej achter erges op het graasveldj de hoond uut te laote. Zoojs dich kinne zegge det ich op het balkon staon en d´r neet in kin. Dich herkins hem aan unne mank loupendje labrador”, zeet Mary.
 
Det vrawke twieëfeltj ff mer giet toch op zeuk nao Huub. Ffkes later keumtj ze trök en zeet, det ze neemes hieef zeen laupe dae aan di-j beschrieving voldeut. “Huhhhh”, dinktj Mary, en ze vreugtj nog es “ Wets dich echt zieker desse dao nerges unne mins met unne manke labrador heef zeen laupe?” Hae kan echt neet wieët eweg zeen.
 
Wetse wat zeet Mary, loup angers mer nao binne hear heej. De achterduur is open, en kom dan mer nao boven richting de slaopkamer dan kinse mich de deur van binne uut open doon. Die buurvraw kiëktj nog waal e bitje raar mer dinktj, ich zal ze toch mer helpe. Dus die vraw luiptj achterom, en treftj dao Huub in de kamer aan. Huub wetj neet woeë dette mot kieëke. Stiet d´r ineins een vreemdje vraw in zien woeënkamer. Dus die vrouw zeet tege Huub: je vrouw staat opgesloten op het balkon. Laotj ze dao mer staon zeet Huub dao stieët ze goot. Dan heb ich dr geine last van.
 
Huub besloeëtj uuteindelik toch um Mary te gaon bevrijden. En waat blieëktj… Gae motj neet trekke aan de balkondeur. Mary haaj dr allein mer ff tegen hoove te dowwe van boete en ze haaj, inclusief al heur nieegel, gewoeën weer binne gestange.

Jeffrey Wullems

Op ‘nne naozomerse daag woorte een dael kammeräöj genuuëdj door Jeffrey um lekker te gaon vaare oppe Maas. Ze haaje ’t rieëk van d’n Uul aangedaon um ’n hepke te aete. De vrawluj wooje net nog e dessert bestelle toen de buienrader aangoof det der ruzie gemaaktj zoej waere inne hiëmel. ’t Zooj met bakke uut de locht kome en dae boet hieëf gein good aafdaakske. Hup rap rap haoste vae os nao de boët, Jeffrey met ziene uutermate fiene moterriek en man zonger angst en schaamte vaartje os richting de haven in Aldeneik.
 
Ongerwieg kwome vae nog 1 groeët obstakel tieëge, De sluis van Remundj. Jeffrey sprook de schoeën wuurd: ‘As de sluis drek oepe és, dae waere vae naat. As de sluis gesloeëte és dan waere vae zeiknaat tot oppe poes.’ Beej de sluis aangekome haaje ze zjuust ’t gelök aan oeës zijde, ze woore net oppe tieëd. Woeë op kapitein Jeffrey aan tante Nel vrugtj um de boej alvast int water te goeze…..
 
Vol oevertuiging en met un inmense kracht de boej ´t water in gegoesj, um d´r daonao vol verbazing achteraan te kieëke det dae boej hieeeeeel rustig wegdobbertj. Kapitein Jeffrey weitj ffkes neet wieë dette ’t heef, mer bedacht zich drek de angst dette zeiknaat tot oppe ongerboks zooj waere asse dae boej nog zooj motte gaon halen. Dus zag hae toen de legendarische wuuërd: ‘Ach, boeie, vae koupe waal ’n now’.
 
Inmiddels woor ’t boeëve de boeët al redelik losgebarste, en woorte de ieërste klejjerstukke al naat. Toen ze in de haven aanmeertje kwoom ’t inmiddels met bakke uut de hieëmel. De boeet gaw dicht gedaon, zieëker neet oppe meneer wie kapitein Jeffrey dit van tante Ricky hieëf gelieërdj, en eederein stieët oppe kant behalve de kapitein zelf. Kapitein Wullems, hieël vermeudj nao zoee unne intense daag, verlutj met zieë bein zien scheep. Mer in al zien enthousiasme um zien scheep zoe druuëg meugelik te verlaote keumtje strumpelendj de steiger op. Hae stiet dao oppe steiger wat zenuwachtig in ziene bokse tès te graaje. Veur det ze ’t doeër hebbe zeen de overige bemanningslieede & toeristen vanne haven iets door de locht vleege. In vertraging zeen ze dit object hieël langkzaam ’t water rake. Jeffrey gieët uut automatische reaksie plat oppe steiger gaon ligge um te graaje waat dao inne Maas aan ´t zeenke woor. De paniek dae op det mement uutbrook beej de kapitein es onbeschrieëfelik um uut te drukke in wuurd. Dit woor neet ziene trawringk, dit woore zien autosleutels.
 
Dus met anger wuërd: Waal oppe tiëd trök inne have, mer zonger boej & zonger autosleutels…. Ze besloete um de schoeënaojers op te belle um ze op te halen, zoeëdet ze thoës de reservesleutels vanne auto koste pakke. Ze kujjere op hun gemaak richting de parkiërplaats um dao te wachte op heure taxi. Ongerwieëges trök de Kapitein lieëkbleik eweg…. ’t Gezicht van kapitein Wullems wannieër dette inne have zieen autosleutel in ’t water lutj valle… Priceless. ’t Mement dette besfetj det ziene hoeëssleutel nog inne auto ligtj… onvergaetelik. En zien steun en towverlaot in barre tieëde, pap & mam, zeen e weekend weg nao ’t noorden van ’t land.
 
De nanny van vreuger vanne kapitein wurdj gebeldj, gelukkig woor die nog wakker. Jeffrey legtj heur ´t verhaol uut, woeë op ze allein mer antwoeërdje: ‘Waat zeeje toch ’n K*TJOONK’. Mer hae haaj gelök, hae mocht de sleutel op koome halen.
 
Hae dacht det ’t un 5 tientjes zooj kosten; en dan tellen vae de benzien nog neet met want: Van de haven nao de nanny, van de nanny nao hoeës. Van thoeës de sleutel neet kinne veenge dus pap en mam op motte bellen, die um veerkantj uut lachte. Van thoeës trök nao de haven, dao de auto ophale mette reserve sleutel. Trök nao hoeës weer, um uuteindelik asnog ’n naate ongerboks hebbe. Indj good al good, zoeëdje zegke. ’t Grepke kosje ‘m uuteindelik ruum €450,-.

 

ZULVER

BROONS

Karian & Peggy Peeters

Oma Toos haaj ‘t in de Corona tiëd wat meujlik en veuldje zich aaf en tow wat einzaam umdet sociaal contacte beperktj moste waere. Daorum haaje heur leeftallige dochters Karian & Peggy iets leuks vör Toos bedachtj. Unne fotolieëst met dao in ‘n paar schoeën, nôw foto’s van eur wichter en kleinwichter. Dan haaj Toos wat um nao te kieke en veuldje ze zich misschien wat minder allein.
 
Karian zoeëj det allemaol waal ffkes regele en bestêldje op internet ’t schoeën kedoo. Un leuke collage van foto’s, met unne schoeëne lieëst d’r um haer. En det vör noch gein 60 euro. Det waas un kuipke, zieëker in Corona tieëd wi-j de prieze online de locht in schoote. Karian woeëntj in Bels, en ’t kedoo woort beej heur aan hoeës bezörgtj. Mer Oma Toos, di-j woeëntj in Wieërt.
 
Dae lieëst most dus van Karian in Bels nao Peggy in Wieërt zoeëdet Peggy dae aan Oma Toos kos gaeve. Met de post zoeëj det al gaw 15 euro koste en dan zoeëj ’t kedoo al gaw 25% deurder waere. Det voonge de dames te gek en toch wat te prieëzig. Det mos goojekouper kinne. Nao völ vieve en zesse besloote de dames um vör de goojekoupste optie te keeze.
 
Karian zoot in Bels, Peggy in Wieërt en de grens zoot potdicht. Ze zoeëje ’t kedoo aane grens aan deindanger oeëverdraage en dan kos Peggy ’t aanbeeje aan Oma Toos. Ze veuldje zich as smokkelaars di-j in vreuger jaore heur koupwaar oeëver de grens moste kriege. Karian reej nao de grens in Bels en Peggy reej, met eure mins, nao de grens in Nederland en dao troffe ze deindanger. Eeder aan heure eige kant, geschei-je door betonbluk. In ‘n paar seconden woor de lieëst oeëvergedraage. Dao haaje ze toch schoeën 15 euro mej bespaardj. ’t Waas ouch fein um weer ’s ffkes beej te kinne kalle, doeër al die corona perikele haaje de zusters deindanger ouch al unne fleenke tieëd neet mieër gezeen. Och, waat waas det fein. Ze haaje unne houp te bekalle.
 
Al buurtendj stoonge ze anne grens allerlei verhaole uut te wisselen, wi-j aan weerskante de plies tieëdes un grenscontrole kwoom vraoge waat de dames dao in godsnaam aan het doon woore!? Karina en Peggy voonge ’t mer onzin det ze heej op aangesproeëke woorte. Karian uit Bels stong in Bels en Peggy stong op Hollandse groond. Niks aan de hand dus!
 
Waat ze vergaete woore waas det vae in Nederland allerlei maotregele haaje wi-j aovendjklokke, mondkepkes en dae bekindje angerhalve maeter. En det ze in Bels op det mement zellefs in unne volledige lockdown zoote. Blijf in uw kot, waas dao de regel. En daojjae det neet!? Dan stieët det te book as un criminele activiteit!
 
En zoeë waas de prieës van ’t kedoo gein 60 euro mier, mer inclusief 250 euro boete vör ’t oeëvertrejje vanne regels kwoom ’t kedoo uut op unne totaalpriës van 310 euro. Mer goot, waal 15 euro verzendkosten bespaardj, det es ouch wat waerd!