Winnaars Gouwe Zulvere en Broonze Lambieck 2024

GOUD

Herman Driessens

Herman Driessens en Henk van Dijk gaon met eur twieën op verkânsie. De “jongès vanne Beest” gaon saame nao het plaetske Malang in Indonesië. Herman is ´nne bevlooge reiziger en der zeen weinig plaatse woeë dieëze Indiana Jones nog neet is gewaesj. Hae dreijtj zien hand d’r neet veur um um allein op ontdekkingstocht te gaon, mer dit joar gieët hae saame met zieëne aoje schoeëlkammeraod op reis. 

Dit verhoal begintj as de hieëre al ´nne drukke daag in Indonesië achter de rugk hebbe. Ze hebbe vandaag völ gezeen en zeen tôw um es waat lekkers te goan eate. Inmiddels koome de rieësttaofels en curry’s de manne de naas uut, en besloeëte ze es unne aovendj te spenderen beej de Japanner… Noadet ze de Japanse keuken goot hebbe getesj en auch un paar drênkskes gedroonke hebbe goan ze trök nao ´t Guest House woeë ze verblieëve. Ônger ut wandele wurtj d’r druk gekaltj over d´n daag en al gâw koome ze erachter det ze zich fleenk hebbe verlaupe. Jao minse.. neet allein vröllie zeen slecht in coördinatie… 

Ze zeen herstikke verdwaaltj en zjuust op ´t moment det ze zich det beseffe begintj zich beej Herman auch waat druk op te bauwe in zieën dêrm. Hae veultj det de sashimi hem toch waal erg slecht is gevallen. Met heftige dêrmkrampe en ´t zweit oppe kop besloeëtj Herman um toch mer un doônker stieëgske in te duike um dae sashimi met völ druk uut zien dêrm te purse! 

Hea gieët gauw doeër de kneeje, mer verstaptj zich, en he struukeltj oever zieën eige bóks. En dao gebeurtj het. Hae kuuëkeltj neet veurover, neij hae veltj knats achteroeëver en waal zieëker 2 meater umlieëg in….. un oeëpe riool. In ut stikke duuster verlieëtj op det moment auch ut lêste van zieën Japanse avontuur het lief van Herman. 

Ônger de schramme en hieël beschieëte (neet allein van hem, mer auch van de rest vanne bevolking van Malang) klautertj Herman weej unne Ninja (des auch Japans) umhoeëg. Boeëve aangekome zuut Herman Henk en ut heef neet vul noedig um uut te legge woerum hea roektj weej un zeikton. 

Ongertusse zeen Henk en Herman nog steeds verdwaaldj. Ze laupe noa de KFC tôw veur een wifi netwerrék te bemachtige en hoeëpelik daomeij auch unne taxi te kinne bestellen. Mer de wandeling gieët toch met een bitje aafstand van mekaar. Ut wêrme klimaat deut Hermans geurtje neet goot zulle we mer zegge. Einmaol aangekome inne KFC begintj dit restaurant hieël angers te roeke dan allein nao kip. Herman besloetj um toch mer noa boeëte te goan. As de taxi einmail aan is gekoome zuut auch dae het neet zitte um Herman met te neeme. Gelôkkig koome ze unne hulpvaardige mîns teege dae “ de Jonges vanne Beest” de gooje weeg wiesj nao ut Guesthouse. 

Dao aangekoome wachtj der unne lekkere douche en nog wat pleisters her en der op Herman. En kinne vae dit verhoal, met un luchtje, aafsloete met: “Waat ich toch heb mej gemaaktj op vekânsie…..” 

Leon Wassenberg

Zoeë as eederein dae Abraham gezeen hieëf en dus boeëve de 50 és, hieëf Leon mej gedaon aan ´t bevolkingsongerzeuk. Nao aanleiding van dit bevolkingsongerzeuk waerdj hae uutgenuuëdigdj vör ’n aanvöllendj ongerzeuk in Remundj. Vraogtj os neet woeerum in Remundj, messchien det d’r gein plaats woor in Wieert… 

Leon beltj op maondjig nao Remundj en hae kos al indj vanne waek dao terecht. Vuueraafgaondj aan ut bezeuk in Remundj leusj Leon, zoee as het huurtj, netjes alle papeere door. Zieën vrâw, die verpleegkundige is, heef alvast un hieël pakket gehaaldj beej de apothieëk vör hem. Alle spullen die heej in zitte, en Leon hellepe met het goot speule van zien derm van teveure, moste op dus Leon begintj zo´n 2 daag van teveure met de zoeë genaamdje prepap. 

Zoeë gezagtj, zoeë gedaon. Daag 1, zekske prepap opgelosj tot ‘n drenkske en sjeng aanne geng. Ut haaj metein effect Leon, zoot ‘s mergus, ‘s middigs en ‘ s aovus oppe wc. Daag 2, zekske twiee prepap opnow opgelosj tot n drenkske en opgedroônke. Daag twiee verleep utzelfdje as daag ein. Weer zoot Leon ‘s mergus, ‘ s middigs en ‘ s aovus oppe wc. 

Leon wis het zieeker, de vuuerbereidinge vör ut ôngerzeuk haaj hae hiee; volges het bukske gedaon. Nôw nog nuchter blieëve op dae daag zelf en dan kwoom alles good in Remundj. Leon ging dus de daag d’r op nao Remundj. Hae mos zich um 10:00 oor in ut zeekehoeës melden. Leon deenktj ‘s mergus nog vandaag gein zekske prepap, waal nuchter blieeve. Zoeë gezagtj, zoeë gedaon. Met unne lege maag zitj hae inne wachtkamer, en waerdj binne geroope. Ieerst ne hieële vraogelieëst saame invölle en vervolgus zeet dae dokter: ¨Zoee det waasj meneer Wassenberg. Gae kintj drek langs de apothieek um de prepap op te haale vör ut ongerzeuk. En haodj d’r raekening mej dejjae nuchter binne motj koome op de daag van ut ongerzeuk¨. 

Woeë op Leon nogal verbaasj zeet: ¨És det neet vandaag?? Ich bin namelik herstikke nuchter en bin al twieë daag prepap aan ut dreenke¨. ¨Nein¨ zeet dae arts, ¨dit és allein ut intake gesprek, ut ongerzeuk weurtj op un angere datum geplendj¨. 

Dus kos Leon un tieëdje later wieër van vuueraaf aan beginne. Uiteindelik es ut met ut ongerzeuk toch nog good gekoome en zeen de derm van Leon herstikke in orde! 

ZULVER

BROONS

Hans Truijen

Eederein kintj van di-j minse, di-j vör daag en dauw opstaon um vör ‘nne baas te gaon wêrke. Zoeë ouch oeëse Hans Truijen. Dit es unne mins dae op ‘ne normaale werkdaag zoeë rond 5 oor opstieët zieën tang poetsj, koffie dreenktj en dan richting Ni-jwieërt vertrektj um te gaon werrike beej Herpertz. 

Vae schrieeve ergus in juni. Hans waerdj wakker um 5 oor, stieët op, poetsj zieen tang, drinktj un tas koffie, smieërtj zieën boterhamme en rond 5.30 gieët hae richting Ni-jwieërt. Richting Herpertz dus. Dao de sluuëtels gepaktj vanne vrachtwaage met oplegger en mette vrachtwaage en kraan d’r op richting Oosterhout. Hae mos ongevieer 100 kilomaeter reeje met de vrachtwaage. Roond 7.00 oor stong hae fris en fruitig in Oosterhout en haaj hae de kraan aafgelaaje en waas hae al hej op aanne gang met de kraan. Ongerwaegus haaj Hans al un paar kieër roondgekieëke oppe snelwieeg en vong hae det ut vör ’n doeërdewaekse daag vreej röstig waas oppe wieeg. Mer good d’r zölle waal ’n houp minse thoeës aan ut werk zeen en daobeej, roond zes oor oppe weeg, es ut zoeëwiezoeë röstig. Waat ‘ne tieëd um al aan ut werk te zeen, roond dae tieëd mot un normaal mins nog gewoeën in bed ligge. 

Gewoeën in bed ligge.. det deej de vrâw van Hans Ineke op det moment waal nog gewoeën. Ineke sleep nog um 5.30 oor weej Hans vertrok. Um un oor of acht, half nuuëge waerdje Ineke wakker. ‘T kieëktj nao rechts. Geine Hans. ¨Woeë es dae now geblieëve, esse nao zieën wêrk messchien?¨ Ineke és un bitje waers det Hans zoeëmer vertrokke és zonger det ze wet-j woeë det hae geblieëve és. Ze stieët op en paktj de mobiele telefoon en beltj Hans… 

¨Goojemêrge, G**verd*****, Lieelik***, Sie***, woeë zeejjae eigenlik?¨ Hans es zich van gein kwaod bewusj en zeet doeëdleuk: ¨In Oosterhout¨. Woeë-op Ineke zeet: ¨Waat mojjae vandaag in Oosterhout¨? Woeë-op Hans reagieërtj: ¨wêrke waat dînks dich angers¨. Ineke waerdj allein mer kwaojer en vraogt: ¨weej zoeë werrike?, dan haadjae det waal fkus kinne zegge.¨ Woeë-op Hans zeet: ¨woeërum ich gaon toch altied wêrke op maondjig tot en met vriedig¨. ¨Dao zitj zjuust ut probleem!!! Ut és vandaag zaoterdig klöppel, en gae haatj waal fkus kinne zegge dejjae op zaoterdig gingtj wêrke¨. 

Hans krabtj zich fkus achter de oeëre en bedeenktj zich det ein en anger neet hieelemaol good és gegange. Hae és vör niks met vrachtwaage en kraan nao Oosterhout gerieëje umdet Hans inne verongerstelling waas det ut maondjig waas en ut waas uuteindelik zaoterdig. 3 – 4 oor vör niks gewerktj, 200 kilomaeter vör niks gerieeje en 80 liter diesel verdamptj verder esse uuteindelik zaoterdigmiddig weer thoeës beej Ineke.