GOUD
Luuk van Deursen
Luuk van Deursen wêrktj daels beej zien pap inne zaak, de Hubo bouwmêrrentj in Ni-jwieërt. Luuk deut neet allein de administratie, mer hieët zien strepe ouch mieër dan verdeentj oppe wêrkvloer en inne verkuip. Ze verkoupe dao alles um van eur huuske e peliêske te make: hout, horre, deure en decorasie tot aan vêrf en vêrfbenoeëdigdheede.
Mer woeë gewêrktj wurdj é ontspanning net zoeë belangrieëk. Métte vastelaovendj van 2025 woeëj Luuk fleenk uutpakke en ging dur vör um ‘ne echte Mike Tyson te waere. ‘Ne badjas, sportbóks en zelfs ‘ne heuse titelreem ontbrook neet.
En ouch de kluuër mos matchen dus op Shein haaj hae ‘ne pot body paint gevoonge en dae besteldj. Beej binnekomst van det pötje hieët hae dit toch efkes getesj en eîn laog op ziene boeëk gedoon, e paar oor laote zitte en de body paint ging d’r gemaekelik vanaaf.
De schoeënste daag van ´t jaor braeke aan… vastelaovendj gieët beginne en Luuk kwoom d’r achter det ein laog bodycoat neet genógt dékdje, dus vriendin Nina légktj nog e laog aan, en nog ein, en nog ein en nog ein …..’t risseltaat moog d’r zeen; Luuk zoog d’r fantastisch uut, Zwerte Piet zoeëj d’r zjeloers op zeen.
Luuk blieëftj dae aovendj beej Nina slaope en nao ‘ne aovendj flînk stappe wiltj Luuk zich efkes douche, mer inne douche keumtj hae d’r achter det dae knoeëj d’r neet vanaaf gieët. Alles woort uut de kast gehaaldj, en Nina uut bed. Van 1.30 wis 5.30 oor hebbe ze saame geprobieërdj ´t schoeën kluuërke d’r vanaaf te boene mer zoonger sökses.
As Luuk trök toês és trekke mam en pap alle registers oeëpe …… wasbenzine, thinner, schoormesjienes, de hieële bouwmêrrentj wurtj oppe kop gezatte um Luuk zuûver te krieëge. De dâmpe vanne chemicaliën zörgdje d’r zelfs vör det Luuk d’r ónpasselik van woeërt.
Gehavendj en oonger de schoorvlekke, heej en dao nog e bitje zwert, gieët Luuk toch nog verder de vastelaovendj in, det neme ze hem neet aaf.
Later blieëk det ‘t pötje “Shein body coat” hétj, mer dej-jae mét dae meuk ouch hieël good chassis-óngerdeîle, schuttinge, vloere en tuinmuuëbels kintj doon ….. Dus as dej-jae beej de Hubo in Ni-jwieërt vraogtj vuuër sliêtvaste vêrf, dan zeej-jae beej ‘t gooje adres, want dao wieëte ze alles aaf van gooje hechting.
Michelle & Juliën Geene- Seerden
Michelle en Juliën woeëne mét eure twieëling van 3 en hundje Timi in e now hoês op Laorvêldj. Fein hoeës, rejaal woeënkamer en hieëlemaol van dieëze tiêd mét allerlej technische snufjes anno 2025.
Zoeë ouch ‘ne super moderne robotstofzuiger, want dae és hieëlemaol te gek en óntieglik hendjig mét ‘ne twieëling. Ze neume ‘m Noo-Noo, verneumdj nao de stofzuiger uut de Teletubbies. Echt een gewêldjig dînk dae Noo-Noo.
Aldaag, roond 04.00 oor ’s mêrges begintj Noo-Noo aan zieën vaste ronde doeër de woeënkamer, zoeë ouch op dae bewusje zaoterdigmêrge.
Um 4 oor loog Michelle en Juliën lângk en breid in bed. Ze wore de aovendj dao vuuër nao ‘n gezellig fieëstje gewaesj en haaje beej thoêkomst geliêk ’t wêrme bedje opgezochtj. Eigelik haaj Juliën Timi nog éfkes uut motte laote, mér um de eîn of ânger rieëje waasj dao neet mieër van gekome…… Meschien zoot d´r wat drânk in de man ofzoeë..
Mer good, efkes waat ângers. Hundje Timi haaj in di-j waek now hóngsvoor gekrieëge, ‘ne hoond mót dao dan wat aan winne. Dus mét det now voor bawdje det langzaam op. Timi vóng det now voor gewêldjig lekker en kost d’r gein genógt van krieëge. Gein sprake van langzame opbaw dus en de dêrm van Timi haaj d´r nogal last van dae vriêdig- op zaoterdignacht. En dan waas Juliën ouch nog vergaete Timi uut te laote, êrm bieëstje.
Lânk verhaol kort: Timi haaj zieën behoefte inne woeënkamer gedaon!
Exact um 04.00 oor keumtj Noo-Noo uut zien hok en begintj mét völ enthousiasme de woeënkamer te stofzuige. Noo-Noo hieët de huîpkes broênigheid van Timi doeër ’t hieël hoês uutgemieërdj tiêdes zien ronde as robotstofzuiger. Timi is in alle kónsternasie oppe bânk gesproonge en hieët ouch dao waat reste diarree achtergelaote.
Wi-j Michelle en Juliën in neet al te fitte toestand op zaoterdigmêrge nao ónger kwome, kwoom de geur van ´t hieël gebuuëre al op eur aaf. Noo-Noo stóng zich óngertösse inne hook weer braaf op te laaje, as-of’ d’r niks gebuuërdj waas. Mer niks waas minder waor, de hieël óngerverdeeping waas besmeurdj mét uutwêrpsele van Timi. De rest vanne daâg stóng in ’t teîke van poetse, d’r móst zelfs é schrobmesjien geheurdj waere um dae vettigheid waas tösse alle voege en plînte uut te krieëge.
Noo-Noo és uuteindelik neet op non-actief gezatte nao dit akkefietje, mer oh no no no waat hieëtj geroeëke dao op Laorvêldj.
ZULVER
BROONS
Lars van de Brandt
Lars, gae kintj um misschieën nog waal as aod-jeugdpreens Lars II vanne Brökwagters en fervênt vastelaovendjveerder, woeëntj nog neet zoeë lang in zieën eîge appartemênt. Aafgeloupe jaor gieët Lars, êrges wiêdewég in Braobentj, mét zieën kammeräöj nao ‘n Halloween-fieëst.
Allieër di-j jong richting Braobentj vertrekke, móst Lars zich nog verkleî-je. En Lars hiltj neet van hâlf wêrk … koste nog meute waerdje gespaardj. Sjiek uutgedosj, mer um ’t gehieël tegooj aaf te make hieët Lars wat liters nep blood gekochtj. Gae kintj det spul waal uut films, van dae mét water aangelîngdje ketchup.
Um ‘t gewînsje effect te realisieëre ginge ze mét zien alle ‘t balkon op en zwejdje ze mét ‘n sabel tieëge de buul blood aan, woeëdoeër ‘n mieër as vuuërtreffelik effect waas gerealisieërdj op alle aanwezige. Lars zoeëj zoeë beej Toverland aanne slaag kinne gaon. D’r leep mieër blood over ’t balkonkerpèt richting ‘t balkon vanne óngerbure dan op de persoeëne woeëvör dit blood bedoeldj waas….
Óngertösse woeër Lars mét zieën kammeräöj al vertrokke obbaan eur fieëstje in Braobentj.
De bure vanne oeëverkânt zooge wat verdachts en beldje de óngerbure van Lars dét ze blood op eur balkon zooge ligke. Det maakdje det de pliesie in e mum van tiêd mét zwêjleechte en loeiendje serines ónger ‘t betreffendje balkon stóng. De pliesie zoog beej Lars nog leecht börre en woeëje ’t hoês van Lars inspectieëre.
‘n Ângere buurman van Lars, en ouch nog eins ’ne gooje bekindje van Lars, zoog de blaw lâmpe en waas benoedj nao al det spektakel.
Hae hieët al gaw doeër dette pliesie d’r vör Lars és. Hae woeëj Lars op belle, mer Lars waas ziene tillefoon vergaete op te laaje en waas dus neet te bereike. Óngertösse hieët de plies al collega’s mét zwaor gerej opgerope, want de pliesie mós op óngerzeuk uut: een moeërd op een balkon in Wieërt!
Gelökig hieët dae bekindje van Lars ’ne reserve sluuëtel van Lars zien appartemênt en kos hae de pliesie, di-j al bekans métte duuërram klaor stónge, binne laote. Einmaol beej Lars binneshoês kos de plies gein liêk vînge en waas ’t dudelik det ’t um Halloween flawwekûl ging.
En ângers hieët Lars toch nog é alibi….
Stiêpels
