Archief
Ieëre-Lambieck

Peter Ottenheym

De Ieëre Lambieck veel in dit jaor in Tegele en woort uutgereiktj aan Peter Ottenheym. Peter Ottenheym waas in 1975 Preens van d’n Oeles uut Tegele en és sinds 1996 actief lid van de Rote Funken in Kölle.

Hae ontdékdje in ‘t casino, hoeéfdkwarteer vanne beroemdje Rote Funken, in Kölle ‘nen asbak uut de begîntiêd van ‘t Venloos vastelaovendjgezelschap ocus. De asbak, ’n legering van koeëper en broons van ongevieër 15 beej 15 centimaeter és vörzeen vanne Jocushaan. Dao umhaer gedrapieërdj de liêfspreuk ‘Jocus Vitae Quad Sal Coenae’ en 2 x 11 = 22.

Umdet Jocus in 1842 és opgerichtj zooj de asbak uut 1864 datieëre, zoeë dacht Peter. Ottenheym waas vuuërnemes dit ‘zeldjzame’exemplaar ter beschikking te stélle vör de groeëte jubileumexpositie van Jocus en zocht heejmej de media op, di-j dit verhaol in alle guuëre en kluuëre nao boete brachte.

Nog gein 24 oor later, kwome de media mét de berichtgaeving det ’t prachtig stökske antiek wat minder aod bleek te zeen as Peter meindje. De asbak bleek neet de datieëre van 1864 mer uut de jaore ’70.
Jocus haaj inne jaore ’70 diverse asbakke uutgegaeve vör de jubilarisse di-j zich 2 x 11 jaor verdeenstelik haaje gemaaktj vör Jocus.

Peter Ottenheym noom de Ieëre Lambieck in ontvangst, vergezeldj doeër de voltallige Garde Tegeliers, ’n delegatie van ’t Venlose vastelaovesgezelschap Jocus, de Huzaren van Glazenap uut Tegele, ’n delegatie van ’t Tegelse vastelaovesgezelschap D’n Oeles, aafgevaardigde vanne Tegelse Aod Oelespreense en Aod Oelesadjudânte, Joekskepèl De Kaetelaers uut Steyl en lede vanne Kaetelaers, ‘n delegatie van ‘t vastelaovesgezelschap De Beerpiêp uut Tegele, zangkwartet ‘Döbbel Hae – Döbbel Het’en e flînk aantal vreende uut ’t plaatselike vereinigingslaeve.