Archief
Ieëre-Lambieck

Sven van der Linden en Stan Vluggen

De Ieëre- Lambieck woor dit jaor uutgereiktj aan Sven van der Linden en Stan Vluggen. De twieë tennissers uut Kerkrade haaje de lokale media ingeschakeldj, umdet ze as publiciteits-stûnt vör eur jeugdtennistoernooi e werreldj-record woeëje gaon vestige.

’t Aoje tennisrecord stóng op 26 oor, 26 minute en 26 seconde. De hieëre lete via de media wieëte det ze vuuërnemes wore dit record te braeke doeër 27 oor achtereîn te gaon tennisse. Mét völ tam-tam, optraejes en mét de mentaal óngerstuuëning van völ supporters woort van 28 op 29 juni ’n geweldjige prestatie nieërgezatte. 27 oor tennisse.

Mer de glâns ging d’r nao eînen daâg al vanaaf. Toen woort namelik bekindj det twieë waeke vuuër de recordpoging van Sven en Stan, twieë joonges uut Apeldoorn 27 oor en ein minuut haaje getennisj. Sven en Stan hebbe vanne Lambieckaovendj gebroêk gemaaktj um de nów recordpoging aan te kondige. Edereîn waas welkom van 27 op 28 juni 2009 beej TC ’54 in Kerkrade.

‘t Zal uch neet verbaze, det ze noow neet kinbaar gemaaktj hebbe wi-j lang ze oppe baan wille gaon staon. Vae kunne uch naovertelle dat dieës twieëdje poging ’n succesvol waas en det ze ‘t werreldj-oor-record op eure naam hebbe staon en waal mét : 34 oor !