Archief
Ieëre-Lambieck

Jack Lamerigts uit Ittervoort

Dit jaor hieët Jack Lamerigts de Ieëre Lambieck verdeendj mét zien stom streêk van boete de Wieërter Gemeindjegrenze. Waat hieët Jack dan gedaon? Det vertélle vae uch gaer.

As hobby klusj Jack inne aovendj-ore hieël waat aaf. Zoeë hieët hae ín ‘t aafgeloupe jaor ’ne veurroeëje Porsche diesel tractor ineîn gezatte. Alle óngerdaele kwome doeër de port beej Jack oppe wêrkplek achter zien hoês. Nao ruum e jaor klusse stóng d’r ‘ne komplieëte tractor innen hoeëf, klaor um ’n proofrit mej te kunne gaon make.

Helaas, niks blieëk minder waor. Zoeë gemaekelik as alle óngerdaele doeër de port nao binne wore gekaome, zoeë meujlik kwoom de tractor in zien gehieël doeër di-jzelfdje port weer nao boete. ‘t Paszje uuteindelik net neet.

Gevolg: D’r mós ’ne hieële groeëte kraanwage aan te pas kaome um de tractor oeëver ‘t hoês van Jack te höffe um asnog de proofrit te kunne gaon make. Jack hieët genoeëte vanne proefrit, mer oppe vraog wi-j hae de tractor weer achter ‘t hoês kriegtj, kan Jack hieël kort zeen: Noeëts mieër !

De schoeëne veurroeëje Porsche diesel tractor blieftj gewoeën oppe oprit staon.