Lambieck Aovendj Archief

Jan Moeëne en Fun van den Berg

In ‘t jaor 1991 woorte d’r neet eîn mer twieë Jan van der Croeën-ieëremedalies uutgereiktj.

Jan Moeëne woor de ieërste vanne twieë Jan van der Croeëndragers dae de ieëremedalie kreeg uutgereiktj. Jan stong aanne weeg van Fanfaar Bronichitia, woor optochtdaelnemer beej de Kuiters en woor daobeej ouch eîn vanne initiatiefnemers vanne oprichting van ‘t vastelaovendjmonemênt ter ieëre van Vorst Jan Coenen oppe Mêrrentj. Daonaeve schreef Jan ouch jaorelânk de tekste vanne Vastelaovendjzêngers.


De twieëdje ieëremedalie ging in det jaor nao Fun van de Berg, de vreugere vuuërzitter vanne Lambieck Knoup. Dit, vanwieëge ‘t 11-jaorig bestaon vanne Fotoportrettegaleri-j woeë Fun de aanzét tów haaj gegaeve. Uut de opbringst vanne veiling op Asgoonsdig, woorte völ gooj doele in Wieërt financieel gestuuëndj.