Lambieck Aovendj Archief

Culturele Piet Hermans en
Veldeke Piet Hermans

Eîne naam en tóch twieë Jan van de Croeën-ieëremedalies in 2001.

Piet Hermans en Piet Hermans; twieë minse di-j zich jaorelânk belangeloos hebbe ingezatte vör de Wieërter samelaeving.

Kultuurambtenaar Piet Hermans kreeg de Jan van der Croeën-ieëremedalie o.a. vör zien humorvolle inleidinge, di-j hae verzörgdje beej de fotoportrettegaleri-jje vanne Lambieck Knoup. Daobeej woor Piet Hermans binne de vastelaovendjwerreldj in zien woeënplaats Ni-jwieërt êrg aktief. Zoeë woor hae oonger mieër tekstschriêver vör buutreedners. In Wieërt woor Piet vörâl bekindj as de mân van ‘t gemeindjelik museum en de mân achter de cultureel waek di-j jaorliks in Wieërt gehaoje woort.

Veldeke Piet, wi-j de ângere Piet Hermans in Wieërt vörâl bekindj woor, maakdje zich stêrk vör ‘t behaod en de promotie van ‘t ‘Wieërtlands.’ Hae wêrkdje mej aan talriêke Veldeke dialectpublicasies; van waekelikse colums inne waekblaar tot en mét ‘t Wieërtlands Woordebook.

Ouch zat hae zich jaorelânk aktief in vör de VVV Wieërt. Veldeke Piet stippeldje tientalle wândel-, fiets- en autoroutes doeër de regio uut en stéldje dao bukskes oeëver same. As Rogstaekerspreens en as jurylid vanne Wieërter optocht hieët hae zich ouch vör de vastelaovendj verdeenstelik gemaaktj.