Lambieck Aovendj Archief

Harry Meeuwissen

De Jan van der Croeën-Ieëremedalie, di-j eder jaor wurtj uutgereiktj aan ’ne persoeën dae zich verdeenstelik hieët gemaaktj vör de Wieërter kultuur en samelaeving gong dit jaor nao Aod-Rogstaekerspreens Harry Meeuwissen.

Harry beteîkentj völ in ’t Wieërter vereinigingslaeve. ‘t Begos ammaol mét de bemiddeling vör de hoêsvesting van Jong Nederland in 1972. In de 35 jaor daonao kos Jong Nederland ouch op Harry’s stuuën raekene beej ’t levere van materiaol en wc-verzeeninge vör de jaorlikse vloeëjemêrrentj.

Ouch wiste de vreejwilligers vanne kêrk op Luuëke Harry eder jaor te vînge vör ’t levere van materiaol vör ’t bawwe van ’ne körststâl.

Daonaeve zoot Harry zoeë’n zieëve jaor in ’t schoeëlbesteur van Wieërt Zuid en woor hae ouch zieëve jaor actief as besteurslid van tennisclub de Rayprickers.

Wieter woor hae vanaaf 1990 tot 2001 lid van VV De Rogstaekers woeë hae kèrtrékker woor van de bouw vanne Rogstaekershal aanne Stekshofwieëg. Ouch woor hae vuuërzitter van de Kemissie LVK (in 1998) en de Gulden Humor (1996 en 2010) wi-j dieës evenemênte in Wieërt woorte georganizieërdj. Harry woor 22 jaor vuuërzitter beej VV De Knoûwels, woeë hae nog altiêd actief lid van és.

Harry dreugtj al jaore zien steinke beej binne de Stichting Sint Martinus Wieërt, en és al zoeë'n 10 jaor actief beej de Fakkelestafette Wieërt. In 2005 kos de Kêrkelike Hermeni-j St. Joseph raekene op Harry's stuuën in ‘t kader van eur 125-jaorig jubileum, woeëbeej e groeët muzikaal evenemênt woort georganizieërdj in samewêrking mét völ ânger muzikânte en gezelschappe.

In 2007 wis de BAM ‘m te vînge vör ‘n spectaculair oeëpening vanne Hameij woeëbeej Wieërt stieëvig muzikaal oppe kaart woort gezatte.

Tot slot kan ouch nog gezagdj waere det Harry ‘n rol hieët gehadj tiêdes de bouw van Scoutingcentrum De Boshoek van Scouting Kieëntj-Moêzel det in 2011 és geoeëpendj.

Hae és zelf ouch ’n aantal jaore lid gewaesj vanne Lambieck Knoup.