Lambieck Aovendj Archief

Noël Seerden

De Jan van der Croeën-ieëremedaalie, di-j eder jaor wûrtj uutgereiktj aan ‘ne persoeën dae zich verdeênstelik hieët gemaaktj vör de Wieërter cultuur en samelaeving, ging dit jaor nao de vuuërmaolig Rogstaekerspreens (1998) Noël Seerden.

Noël begós op jeugdige laeftiêd as organist / dirigênt z’n muzikaal carrière beej jeugdkoeër De Laarder Rakkers en Zângvereiniging Laor. Dieës muzikaal carrière krieëg vanaaf 1980 wiêter gestalte, doeërdet Noël as eîn vanne oprichters vanne Streetsingers en ouch as dirigênt z’n háng uut de mowwe stoôk. Vanaaf 2006 zeen daonaeve de Young Streetsingers, ónger de bezeêlendje leiding van Noël, van start gegânge. Wiêter és hae vanaaf 1991 medeoprichter en ouch dirigênt van ‘t Jongemannekoeër, inmiddels baeter bekintj as Manoeuvre.

Boonte-aovendjbezeûkers kinne de nowwe Jan van der Croeëndrager ouch as organist/ dirigênt van de Wieërter Vastelaovendjzêngers, di-j 19 jaor lânk ‘n vast succesnummer wore in ‘t Rogstaekersprogram. Daonaeve woor hae jaorelânk o.a. dirigênt van de Zangertjes van St. Frans, Unit (later Jumble) uut Rooy, ‘t Wilma Mannekoeër en van Zangvereiniging Venrode in Venray. Ouch vervöldje dieëze muzikale mins de rol van gastdirigênt / repetitor beej verschillendje ânger koeëre inne regio en tiêdes diverse Promsconcerte.

Noël és vanaaf ‘t ieërste oor lid van ´Vastelaovendjvereiniging De Kloeëtmejoeërs´ en vanaaf 2000 lid vanne Stichting Weerter Operettes. ‘t És Noël dae (mej)verântwoeërdelik woor vör de heruutveûring van de ´Jan van der Croeën operette´ in 1993 en ´de Rogstaekersoperette´ in 2000. Ouch és Noël ein vanne schriêvers vanne Wieërter operette ´Herfst´ in 2004.

En of det allemaol neet genóg és hieët dieëze muzikale mân zich jaorelânk verdeênstelik gemaaktj as jurylid beej de verkezing van ‘t Wieërter Vastelaovendjlidje, ‘t Toêt- en Blaosfieëst en de Slaag um de Merrêntj van de Rogstaekers.

Daonaeve és Noël, lid inne Orde van Oranje Nassau, ouch jurylid gewaesj van ‘t Wieërterlând-leêd in ‘t kader van 600 jaor Wieërt.