Lambieck Aovendj Archief

Peter van Akkerveken


Gruuëts es de Stichting Lambieck Knoup Wieërt um de Jan van der Croeëndrager 2017 te kunne prizzentieëre:

Peter van Akkerveken

Ve kinne Peter as un hieël bi-jzundjer en betrokke persoeën dae zich vol passie as vri-jwilliger inzetj vör un –tal aan vereiniginge en stichtinge. Zoe es Peter vanaaf 1996 lid van ut Platform Gehandicapten Weert, woe hae vanaaf 2011 besteurslid es. As ervaringsdeskundige tôwgankelikheid verrichtj hae völ werk vör de gemeindje Wieërt. Ônger ângere kontrolieëre, signalieëre en advisieëre over ut gebroeëk en tôwgankelikheid van beveurbieëldj openbare gebawwe.

Ouch VV de Rogstakers kan vanaaf 2000 onveurwaardelik op Peter’s stuuën raekene. Hae zjurieërtj al jaore inne Wichteroptocht mer ouch inne Rogstaekersoptocht. Daobeej es hae un gewaardieërdj zjurielid tiedes de Slaag um de Merrentj. Daonaeve beetj dieëze vastelaovendjveerder ouch un helplendje hand beej ut koppe-bawwe inne Rogstaekershal.

Vanaaf 2011 es Peter besteurslid vanne Stichting Gran Fiësta deej jaorliks ut geweldjige en swingendje Bantopa Party Wieërt oganisieërtj.

Wieter es Peter vanaaf 2012 as besteurder verboonge aanne Stichting Bewoeëners Organisasie Binnenstad (BOB) woe-in de belange vanne bewoeëners waere behartigdj van ôngerwerpe as: schoeën, alik en (sociaal) veilig.

Ouch de Lambieck kan al jaore op Peters’ helpendje hand raekene tiedes de Lamieckavendj, deej vae as Stichting Lambieck Knoup jaorliks organisieëre. En asof dit noch neet allemaol genog es, es Peter lid vanne Broederschap van de Miraculeuze Onze Lieve Vrouwe tot Weert, vanaaf 2015 verbonge as lid van de Steunfractie en expertgroep van DUS Wieërt en un betrokke lid vanne Gilde van Wieërter Stadsschutte Sinte Catherina 1480.