Lambieckaovendj Archief

Wieërter Mannekoeër

GOUD 1980

Umdet e möpke inne Rogstaekersgezét uut 1979 beej ’t Wieërter Mannekoeër in ’t verkieërdje kaelsgaât woor geschoeëte, eiszje zeuj van Vorst Jan Coenen det de vastelaovendjgezét uut de verkoup woort gehaaldj. Um dieës eis kracht beej te zétte, dreigdje ze eur mejwêrking aanne Boonte Aovendje akuut te stake. Vorst Jan kos toen neet ângers as de Rogstaekersgezét uut de verkoup te hale. Daomej gong de ieërste Gouwe Lambieck oeëver ’t jaor 1978 nao ‘t Wieërter Mannekoeër. De uutreiking vong plaats in 1980!

Wêrknemersperti-j

ZULVER 1980

Beej de jaorlikse algemein politieke beschouwing inne Wieërter gemeindjeraod in 1978, opperdje raodslid René Verheggen ’t idee um in Wieërt ’ne ‘mediapriês’ in ’t laeve te rope. De media in oeës Wieërter Lând bestoonge in daen tiêd allein uut De Limburger, ’t Kanton Wieërt, ’t Lând van Wieërt en Op de Keper. Mét veer gegadigdje di-j de priês inne wacht koste sleîpe, woort ’t idee nao ’t lând der fabele gesteurdj. De pörspriês kwoom d’r dan ouch neet, of toch waal?

Harrie Hendriks

BROONS 1980

Harry woort ongerscheî-je as ontdekker van de ‘gemeindjelike gaapzin’. Gae vraogtj uch neteurlik aaf waat hae heejoonger verstieët? Van di-j prachtige ambtelike volzinne mét zoeë onnoemelik völ beejzinne det ein zin mieër as 150 wuuërd oftewaal ’n half pagina besleutj.