Lambieckaovendj Archief

Piet Hermans

GOUD 1984

Piet woor as cultureel ambtenaar betrokke beej ‘t plaatse van ‘t bieëldje beej ´t Höfke. Mer tösse ‘t aankondige en ‘t daadwêrkelik plaatse gînge bekans drej jaor vörbeej. ‘t Woor Piet dae verschillendje kieëre de officiëel aankondiging van plaatsing kos neume. Mer ‘t woor ouch konstânt Piet dae mós uutlegke woeërum ‘t bieëldje toch neet kos waere geplaatsj. Tiêdes de officiëel onthulling woor ‘t Piet dae straoldje doeër aafwezigheid.

Alouis Heymans

ZULVER 1984

In ‘ne tiêd van zwaor bezuniginge woort binne de gemeindje Wieërt ‘t mes gezatte inne subsidies vör de sociaal kultureel instéllinge. Dit haaj as gevolg det de verantwoeërdelike wéthaojer, Alouis Heymans, de wîndj van vuuëre kreeg. Hae woort oonger ângere doeër de Sociaal Culturele Raod tot ‘Keuning Onbenûl’ uutgerope. Heej woor de körsvörse wéthaojer ‘t neet mej ins. Dus goof hae tiêdes de jaorvergadering van dieëze raod dudelik te kinne det hae ´Geîne Keuning Onbenûl´ woor.

De Sopsiêmesse

BROONS 1984

’t Wore de Sopsiêmesse di-j tiêdes eur jubileum in 1983 woorte verieërdj mét e kedo vanne Stadsvastelaovendjvereiniging D’n Uul uut Remundj. ‘t Kedo woor ‘ne laeves-groeëte uul, dae de Sopsiêmesse ter ieëre van ‘t jubileum van D’n Uul in 1979 oppe stoep vuuër ‘t stadhoês in Remundj haaje gezatte.

Daonaeve bleke de ´Uule´ uut Remundj in staot ‘t officiële straotnaambordje ´de Oelemarkt´ in alle geniep wég te hebbe gehaaldj en te hebbe vervânge doeër ‘de Uulemert’. ‘t Naambordje hong oppe gaevel van ‘t stamkefee vanne Sopsiêmesse. Tot slot wore ‘t de Sopsiêmesse di-j, as ieërste Wieërter vastelaovendjvereiniging, ‘n komplieëte vuuërpagina wiste te völle inne Remundjse vastelaovendjgezét ‘Het Zwetskammezaol.’