Lambieckaovendj Archief

Henk Hietbrink

GOUD 1988

Generaal Henk Hietbrink en zien vraw haaje genoeëte van e geweldjig Galabâl vanne Rogstaekers. Mer einmaol richting hoês wore de hoêssluuëtels in gein vêldje of wieëge te bekinne. Tjèh, midden inne nacht. Waat te doon? Inbraeke in de eige wuuëning of ‘n hotelkamer beej Jan van der Croeën boke? De léste optie leek ‘t béste. Dus de volgendje daâg ging ‘t echtpaar Hietbrink, hae in smoking en zeuj in t lânk, nao hoês. E prachtig gezicht, zoeë kos de oefenendje Hermeni-j St. Joeëzef (woeë Henk toen vuuërzitter van woor) al lachendj beame.

Kiwanisclub Wieërt

ZULVER 1988

De Kiwanisclub haaj mét hieël völ bombarie aangekondigdj det zeuj ´ne 12 maeter hoeëge körstboum in Wieërt zoeëje gaon plaatse. ‘t Woor nog noeëts in oeës Wieërter Lând vertoeëndj. Bewoongering alum. Mer beej aankomst in Wieërt bleek de 12 maeter hoeëge boum, neet 12 mer âmper 6 maeter te zeen. Zoeë kos ‘t dus gebuuëre det de körstboum, in ‘t doeër de gemeindje gegrave gaat van 4 maeter, bekans hieëlemaol verdwieën.

Ted van den Hurk

BROONS 1988

Ted van de Hurk, vuuërmalig eigenaar vanne Taverne de Oude Munt, kreeg de Broonze Lambieck oeëverhandigdj. Dit vanwieëge zien köstelike meneer van advertieëre. Hieël Wieërt haaj Ted in ‘t vuuërgaondje jaor óngermieër as Sinterklaos, Körstmân, Paoshaas en as aspergestaeker in zien óngerbóks kunne zeen.