Lambieckaovendj Archief

Cor Damhuis

GOUD 1993

De Wieërter beroepsfotograaf maakdje ´n fotoreportaasj van ‘t broêdspaar Neijgh van Lier in museum de Tiendschuur. Vuuërdet de suppoost aafsloeët, haaj hae niks mieër gehuuërdj en dus woor hae d´r van uut gegânge det ‘t gezelschap al richting broêloft woor.

Mer umdet Cor mieër tiêd noeëdig haaj as de oeëpeningstiêde towstoonge, woort ‘t pasgetrawdje stél mét fotograaf opgesloeëte in ‘t museum. Broêd, broêdegom en oeëze Lambieckwinnaar móste uuteindelik via ‘ne raam uutbraeke. Detail: de broêdegom woor de zoeën vanne pliesiecommissaris.

Theo Spaans

ZULVER 1993

Theo woor lid van ‘t comité det eder jaor in Wieërt de intocht van Sinterklaos organizieërdje. En daorum moch Theo ter óngerstuuëning van Sinterklaos teîkeninge aanneme di-j de Heiligmân vanne wichter kreeg. Waat gebuuërdje d´r? Vuuër de ouge van ´ne camera van Wieërt TV, verfrommeldje de Zulvere Lambieckwinnaar ´n deîl teîkeninge di-j de Sint e paar sekonde daovuuër vanne wichter haaj gekrege.

Jo Jacobs

BROONS 1993

De vuuërzitter van voetbalclub RKSVV Zwertbrook kreeg uut hang van Willy van de Kerkhof (aod PSV-spuuëler) de Broonze Lambieck uutgereiktj. Jo woeërt namelijk beej ‘t PSV-stadion opgepaktj as vermeindj zwerthandelaar. Terwiêl Jo allein mer twieë kaertjes, di-j hae oeëver haaj, trök woeëj brînge nao de kassa. Jo bleef ore in ´n Eindhovense cel umdet de pliesiemèn ‘t verhaol van Jo waal spannendj mer neet geluifwaerdig voonge.