Lambieckaovendj Archief

Margot van Henten

GOUD 1999

Op vastelaovendjzoondig lieërtj Margot van Henten uut Wieërt ´ne clown (laesj: Jos Smeets) kinne. Nao ´ne gezellige aovendj luiptj hae, beej e groeët gebrek aan taxi´s, mét Margot nao hoês. ‘t Alternatief um doeër de kaoj nao Ni-jwieërt te loupe, sprook hem neet aan en dus mocht de clown oppe bânk bliêve slaope.

Wat geplaogdj doeër naodorst wurtj Margot snachs wakker en drînktj ‘t glaâs water det inne badkamer stieët in eîne kieër lieëg. De volgendje mêrge vrugtj Jos woeë ‘t glaâs water és geblieëve. ´Wi-jzoeë?´ vrugtj Margot. Woeë-op Jos eur lutj wieëte det zien contactlênze dao-in zote.

Rob Tillemans

ZULVER 1999

Wi-j kojje mét good fatsoen aaf van spulle woeë dejje herstikke op uutgekieëke zeetj? Ge kintj ze wéggaeve aan ´n vereiniging di-j ´n vloeëjemêrrentj organizieërtj. Gae zeetj d´r vanaaf, vör de vereiniging levertj ‘t wat gêldj op en emes ângers és d´r weer bli-j mej. Det woor dan ouch de gedachte van Willemien, vraw van Rob, di-j hieëlemaol woor uutgekieëke op ´ne wiênrék. Neet völ later ging Rob nao de vloeëjemêrrentj, op zeuk nao ´n aoj globe vör zien broor. En woeë keumtje mej thoês? Mét ‘t bewuszje wiênrék.

Fred Gubbels

BROONS 1999

Tiêdes ´n verkânsie van zien vraw Hetty, mós Fred zien eige pötje koke. Geîn pûnt vör emes dae frietjes op ziene tiêd heerlik vingtj. Slûm as hae és, zétj Fred de frietpan boeteshoês um geîne rommel inne kuuëke te hebbe. Mer ‘t woort waal ‘n rotzooj want op e gegaeve memênt drieftj d´r mieër vét boete as inne vétpan. Nao iêverig schrobbe keumtj Fred tot de pienlike konklusie det de tegels neet mieër toeënbaar zeen. Um aanne ellendje ’ne kómaaf te make, gieët Fred de tegels vervânge um te vuuërkaome det Hetty ouch mer wat ontdéktj. Mislöktj. ‘t Veel Hetty innegang op.