Lambieckaovendj Archief

Sjaak Winkelmolen

GOUD 2000

Sjaak maakdje zich verdeenstelik as kontroleur tiêdes kienaovendje in buurthoês Moêzel. As kontroleur vanne nummerkes haaj oeëze Gouwe Lambieckwinnaar ´ne zendmicrofoon zoeëdet hae de kiengetalle kos aaflaeze. Sjaak vergoot ziene zendmicrofoon uut te zétte wi-j hae tiêdes de pauze ´ne sanitaire stop maakdje. Gevolg heejvan woor det de dames in ‘t drök bezochdje buurtcentrum alle verrichtinge van Sjaak en zien eige kommentaar dao-op, innegang via de luidspraekers koste vôlge.

Jeroen van Summeren

ZULVER 2000

Tiêdes de fieëstelike heroeëpening van ‘t wînkelcentrum Moêzel zoeëj Jeroen vanuut ziene drânkhândel vör ‘n drênkske zörge. Hae zat´ne beertap vuuër de etalaasj van Van Lieshout makelaardij. Dao és namelik e schróbgaât vör de riolieëring en dao kos dan de slang vanne lekbak en ‘t speulwater in waere gestoptj. Det pötje bleek in wêrkelikheid de ontluchting vanne kêlder van dae hoêzeverkouper. Dus âl ‘t lekwater van ‘t tappe tiêdes ‘t fieëst lekdje wég inne kêlder vanne makelaar.

Pierre Snijders

BROONS 2000

Bakker Pierre Snijders goof zien dochter vör eure verjaordaag ‘n geweldjig schoeën verjaordaagstaart. As bakker maakdje hae akelig völ indrök mét de vör eur bezûndjer gemaakdje taart. Mer Pierre veel aardig doeër de mang. ‘t Bleek te gaon um ´n etalaasjtaart. Ge motj wieëte det di-j taarte uut vét waere gemaaktj en dus écht neet te vrieëte zeen.