Lambieckaovendj Archief

Miranda Feijen

GOUD 2001

Miranda, wêrkzaam beej de Rabobank in Wieërt, mós efkes wat uut de wage inne parkieërgaraasj hale. Noow woor de gemeindje dao aan ‘t wêrk. Geîn pûnt. Miranda zoeëj waal efkes oeëver de pas gegrave koel sprînge. Ve laote efkes in ‘t midde of di-j koel te breîd of d’n aanluip te kort woor, mer Miranda kwoom midde in di-j koel terecht. Nog geîn pûnt, woor ‘t neet det de koel kort daovuuër tot de rând woor vôl gestortj mét vörse betonmortel.

Karin van de Nieuwenhoven en Jos Slaats

ZULVER 2001

Karin en Jos, vuuërhaer uutbaters van kefee De Tramhalt, mochte de Zulvere Lambieck in ontvangst neme. Jos beklaagdje zich tieëge Karin det de klânte allegedeurige mieër oprolhânddeuk gebroêkdje.

Daodoeër woorte de köste vör de hânddookservice alsmer hoeëger. Nao e menuutje dînke, keumtj Karin tot ‘t besef det dit onmuuëgelik és. Ze haaje oppe wc´s dispensers mét pepeere dukskes hange. Di-j gaon nao gebroêk innegang inne voelesbak. Blieëk Jos al ruum e jaor de raekeninge vör de hânddookservice van kefee De Tramhalte in Remundj te hebbe betaaldj.

Buurtvereiniging Staat

BROONS 2001

De buurtvereiniging uut Ni-jwieërt ging körstbuim kappe um de straot te versiere beej gelaegenheid vanne gouwe broêleft van ‘t echtpaar Mertens. D’n houp mét körstbuim woort opgeslage oppe binneplaats van kefee De Stiek. Kinnelik woor dieës plaats neet veilig vör de gemeindje-ambtenare van Ni-jwieërt. Zeuj wore namelik drök doondje mét ‘t versnuppere van alle körstbuim di-j inne körstwaeke inne hoêskamers haaje gestânge.