Lambieckaovendj Archief

Ger Barents

GOUD 2003

Ger Barents ging inne zoeëmer van 2002 mét zien breurs en naeve nao de jaorvergadering vanne Stucadoeërsboond. Nao aafloup woort d´r nog genoeëte van ´n hepke en ´n drênkske. Tiêdes de trökreis nao hoês, spuuëldje ‘t aete beej Ger op en uuteindelik mós hae gebroêk make van ‘ne plastic buul.

Dae buul mét inhaod woort vervolges uut de ri-jjendje bös gegoesj umdet de inhaod neet êrg fris rook. Net trök in Wieërt ontdékdje Ger det tiêdes ‘t ‘verhêlpe van zien ongereef´ouch zien ´derdje tang´ inne buul terecht wore gekaome. D´r reszje weinig ângers as trök te ri-jje en op zeuk te gaon nao de buul mét inhaod. Naef Roy en Ger gînge dus trök en as e woonger woeërt de buul doeër Roy gevoonge. Roy leet de ieër aan Ger um de plastic buul op inhaod nao te kieke.

Mark Frenken

ZULVER 2003

Mark maakdje beej de oeëvergânk vanne zoeëmer- nao de wîntjertiêd - ´n hieël minselike vergissing doeër te vergaete um de klok ein oor trök te zétte. ‘t Gevolg woor det Mark op maondjigmêrge ein oor te vreug op zien wêrk beej Bosch verscheen. Det zörgtj neteurlik vör de noeëdige hilariteit.
‘Det gebuuërtj mich neet nog ´ne kieër,’ dacht Mark wi-j hae smiddes thoês kwoom. Dus woort de klok vuuër ‘t slaope gaon ein oor vuuëruut gezatte. Met as logisch gevolg dat hae de volgendje mêrge twieë oor te vreug op zien wêrk verscheen. Op wieëg nao Bosch haaj hae dae mêrge waal oppe elektronische klok vanne BAM/Wilma gezeen det dao ´5´ stóng, mer Mark woor inne veróngerstélling det dit de boetetemperateur betrof...

Frans Snels

BROONS 2003

De Broonze Lambieck és towgekindj aan vuuërmalig Boonte Aovendj artiest en komiek Frans Snels. Frans ging aafgeloupe zoeëmer op kampieërverkânsie in Duitsland. Dao leep ziene wage ´ne dûmpel op doeër ‘t enthousiaste voetbalspuuël van ´n Duits wécht. Frans kos de schaaj thoês laote reparieëre en de köste in Duitsland verhale.

Beej de Volkswage-garaasj in Wieërt deej Frans uutgebrédj verslaâg van zien Duitse ervaringe. Daobeej puttendj uut ´n waalgevöldje doeës vôl clichés oeëver Duitsers. Komplieët mét ´Lederhose, Manschaft en de Bierbauch´. Frans és neet op zie mundje gevalle, mer veel stil wi-j bleek det wêrkplaatschef woeëtieëge hae zien verhaol in geure en kleure haaj vertéldj, van Duitse komaaf bleek te zeen.