Lambieckaovendj Archief

Adri-Jan Stroeks

GOUD 2005

‘t Aanlégke van e zwumbad és deur. Dus prebieërdje Adri-Jan Stroeks nao zien verhoezing nao Altwieërthej de köste e bitje te drökke. Det dit ´ne Gouwe Lambieck zoeëj gaon oplevere vör de stomste streêk van 2004, kos hae toen nog neet wieëte.

E zwumbadje grave stéltj neet zoeëvöl vuuër, dacht Stroeks. Dus begos hae zelf te grave en leet hae twieë kontainers kaome um de groond aaf te veure. Eîne vör de zwerte en eîne vör de gaele zând. Viêf euro per kuub kosj ‘t aafveure vanne groond, mer dan zeeje d´r ouch vör ins en altiêd vanaaf, riddenieërdje Stroeks. Gelökkig kreeg hae nog waal oppe tiêd ´n waarschowwing van ziene buurmân. ´Zörgtj dejje wat gaele zand trök haodj, want ge motj straks tegels légke´, aldus de gooje raod. Drej waeke lânk stook Adri-Jan eder vreej eurke in ‘t grave aan zien zwumbad. Hae leet e paar kroekèrre gaele zand achter vör de aafwêrking van ‘t zwumbad.

Wi-j ‘t bad woor geplaatsj, bleek det Stroeks hieël völ gaele zand tekort kwoom. Dus mós hae zând beejkoupe. ‘t Loeënbedriêf waat ieërder zien kontainers haaj aafgeveurdj, leet wieëte det dit totaal geîn probleem woor. Vör nuuëge euro per kuub kos hae ziene eige gaele zand trökkoupe, dae hae ieërder vör viêf euro per kuub leet aafveure.

Jos Aendekerk

ZULVER 2005

De Zulvere Lambieck woort uutgereiktj aan Jos Aendekerk, lid van kepèl Klink Klaor. Nao ´nen aovendj beugele zoge Jos en zien vraw det de roête vanne wage towgevrore wore.

Gelökkig haaj Jos ´n spuitbös mét roête-ontdoeëjer inne wage ligke. Terwiêl zien vraw al instapdje, ging Jos mét de spuitbös aanne gang. Mer wi-jzieër Jos ouch spoot, de roête-ontdoeëjdje neet. En ‘t spul uut di-j bös begos ouch aardig te stînke. Wi-j Jos de spuitbös ‘s baeter bekeek, zoog hae det hae ‘n spuitbös mét groondverf in zien hang haaj in plaats van de bös mét de roête-ontdoeëjer.

Jac Hendrix

BROONS 2005

Gruuëts op ziene nowwe leasewage, haaj Jac al vanaaf ‘t begîn pech mét zien aanwinst. Ziene wage stóng namelik um de haverklap onaafgesloeëte oppe oprit. Terwiêl de gruuëtse bezitter toch écht op ‘t gooje knupke vanne aafstândsbedeening vör ‘t centraal aafsloête haaj gedoedj. De garaasj kos ‘t probleem neet opgelosj kriêge. Waal woorte de sluuëtels opnow gekodieërdj, mer de wage bleef geregeldj onaafgesloeëte oppe oprit staon.

Hendix besloot mer ‘s beej de bure nao te vraoge. Zoeëje de wages meschien ein aafstândsbedeening oppe zelfdje frequentie hebbe? ‘t Leverdje niks op. Jac woort d´r stapelgek van en waas d´rvan oeëvertuuëgdj det emes ´n grap mét ‘m uuthaaldje. Hae bleef aovendjelângk poste vuuër de raam. Soonger resultaat. Trök nao de garaasj. De dealer verving alle sloeëte, mer ‘t probleem bleef bestaon. Jac zoot mét zien hang inne haor, wi-j op e gegaeve memênt de oplossing kwoom.

´n Oplossing di-j völ dochter beej loog, as Jac haaj dörve droume. In zien eige bóksetès. Want dao zoot de buuërs mét de reservesluuëtel. En op ‘t memênt det Jac ging zitte of êrges tieëgenaan stóng, woort ‘t knöpke van dieëze reservesluuëtel ingedröktj en wore de duuëre vanne leasewage dus ope.