Lambieckaovendj Archief

Jo van Eijk

GOUD 2006

E plasje plege, kân tot ’nen houp kónsternâsie leî-je , zoeë hieët Jo van Eijk ervare tiêdes zien verbliêf in e Rotterdams hotel. Nao ‘nen aovendj fieëste ging Jo same mét zien vraw meug mer voldaon nao ‘t hotel. Um ‘n oor of 5 smêrges wurtj Jo zien vraw wakker doeër volle bak leecht en ‘nen houp gevlook woeë-op ze eure mins poedelnaaks de hotelkamer zuût binnekaome en zich haardop aafvrugtj: ‘Woeë kojjae vanaaf?’

Det kos Jo eur waal vertélle: Jo mós nao de wc, woor opgestânge, nao de wc geloupe, en wakker gewoeëre wi-j hae oppe gânk stóng en de duuër vanne hotelkamer achter zich tow veel. Jo hawdje oppe duuër, reep z’n vraw en deej z’n uterste bést um z’n vraw wakker te make, soonger daobeej ânger hotelgaste wakker te make. Soonger ‘t gewînszje resultaat. Op zich woor det nog geîn pûnt, mer Jo slieëptj altiêd in z’n Adamskostuum én hae mós nog altiêd pisse. Uut noeëd geboeëre hieët Jo ‘ne plântebak as urinoir gebroêktj. Toen de lift in, op wieëg nao de portier.

Gae begriêptj det de portier, mét ‘ne smile van oeër wis oeër, Jo te woeërd stóng wi-j dae um e now kaertje vroog um zien kamer in te kunne. Det woor neteurlik geîn probleem. Terwiêl de portier ‘t kaertje ging pakke, ging Jo alvast inne lift staon. Mer ouch det bleek neet mej te valle, mét z’n hang vör zien ‘zaakje’ en ‘n liftduuër di-j almer tow ging. Uuteindelik kos hae mét zien now kaertje trök nao z’n kamer, woeë zien vraw noow waal wakker woor en tieën menute d’rvuuër neet.

Welly en Angelley Op Heij

ZULVER 2006

Welly en Angelly Op Heij gînge op eure léste verkânsiedaâg mét eur dochterke Meike nao de Ikea. Op wieëg nao d’n uutgânk kreeg Meike ‘n iêske umdet ‘t zich good haaj gedrage. Al wândelendj nao de wage veel ‘t besloêt um toch det tillevisiekestje te koupe, waat ze binne haaje gezeen. Mer umdet Meike d’n iês haaj, kos het neet mej nao binne en dus blieëve Angelly en Meike effe inne wage wachte op Welly, dae ‘t kestje ging koupe.

Welly leep trök nao de Ikea en dowdje, uut gewuuëndje, op z’ne sluuëtel um de duuëre vanne wage te sloête. Welly woor zich nêrges van bewusj, ouch neet van ‘t feit det as de wage és aafgesloeëte, ‘t alarm ouch ingeschakeldj wurtj. Zoeë ouch, de bewieëgingsmelder inne wage. Wi-j Welly zjuust d’n hook um woor, gebuuërdje ‘t vör d’n ieërste kieër: ‘t alarm ging aaf. Al toeterendj stóng dae wage oppe parkieërplaats mét dao-in ‘n moôder mét eur dochter, di-j d’r hieëlemaol niks aan koste doon. Nao ‘n menuut stopdje ‘t alarm, mer ‘t iêske woor nog neet op. En toen woor ‘t keze tösse twieë slechte opties: smêltendj iês oppe bekleî-jing of ‘t iêske aete en … toêt, toêt, toêt.

En jao, stil zitte mojje lieëre, dus… toêt, toêt, toêt. De elektronica van tieëgeswoeërdig és zoeë wiêt doeërgeveurdj det as eure wage és aafgesloeëte, gae d’r dus neet in huuërtj te zitte en duuëre en rame dus neet te oeëpene zeen van binnenuut. Toêt, toêt, toêt. Op e gegaeve memênt hieët Angelly mét hang en veut aan umstanders dudelik wieëte te make det ze binne beej de Ikea móste laote umrope det de besteurder van de roeëje Volvo drîngendj nao de parkieërplaats mós kaome. Welly huuërdje dieës boeëdschap waal, mer woor zich van geîn kwaod bewusj en dacht: ‘Angelly en Meike létte op de wage dus dit bericht kân noeëts vör mich zeen.’

Miranda Brangers

BROONS 2006

As fluitiste van ‘t fluit- en tamboerkorps van schötteri-j St. Job woor Miranda oeëvertuugdj van ‘t feit dat St. Job in 2005 eur 60-jaorig jubileum zoeëj veere. Jaorliks veertj St. Job roond 10 mei eur patroeënsfieëst. Dieëze daâg és dan ouch ‘ne groeëte fieëstdaâg vör de St.Job-lede, aod-lede, eur femiêlie en donateurs. St. Job hieët ouch ‘n drök bezochdje website en via dieës website kwoom Miranda op ‘t spoeër van ‘n aod-lid, Ruud Westerhout, dae al jaore in St. Petersburg (Rusland) woeëntj.

Nao verschillendje mailtjes haaj Miranda Ruud zoeë enthousiast gekrieëge det Ruud mét z’n hieël femiêlie begîn mei 2005 nao Wieërt kwoom. Zoeë kos Ruud op 7 mei 2005 ‘t 60-jaorig jubileumfieëst beejwoeëne. Ruud arrivieërdje inderdaad op 7 mei in ‘t verenigingsgebouw van schötteri-j St. Job. Mer hae woor, mét dânk aan Miranda, e jaor te vreug vör ‘t jubileumfieëst. De schötteri-j di-j in 1946 woort opgerichtj veerdje in 2006 eur 60-jaorig jubileum.