Lambieckaovendj Archief

Gerard van Hoof

GOUD 2008

Gerard, vertieëgewoeërdiger in verfware, zoeëj ‘nen ângere leasewage kriêge. Vuuërdet hae z’ne wage zoeëj inlevere, zoeë vóng Gerard, haaj dieëze ‘n grondige schoeënmaakbuuërt noeëdig. Naodet Gerard beej de wasstraot woor aangekaome, maakdje hae de wage en de kofferruumdje hieëlemaol lieëg. Hae zat alle spulle, woeë-oonger ‘n 5-liter blik mét gael verf, vlak naeve en achter de wage en begós vervolges de wage te stofzuige. ‘t Koszje wat tiêd mer ‘t rizzeltaat mocht d’r zeen: van binne hieëlemaol zuûver.

Umdet óngertösse vuuër ‘m ‘nen ângere wage stóng geparkieërdj, mós Gerard ieërst e stökske inne achteruut vuuër hae de wasstraot in kos ri-jje. Gerard és neet de mieëst röstige besteurder en goof dus flînk gaas. Nao înkel maeters te hebben gerieëje huuërdje hae ‘ne slaâg of d’r e kanon woort aafgeschoeëte.

Gerard en de umstanders schrokke zich wîldj. De umstanders schrokke neet allein van dae knal mer ouch vanne ravaasj di-j woor aangerichtj en waarschowdje Gerard. Waat woor d’r namelik gebuuërdj? De inhaod van ‘t blik mét gael verf woor alle kânte op gespoeëte. Neet allein Gerard z’ne wage mer ouch de moor vanne wasstraot, e paar umstanders en ânger wages wore hieëlemaol oonger de gael verf gespoeëte. Aanne rând vanne oprit loog de ‘schöldjige’, ‘n complieët plat gerieëje blik verf van 5 liter.
De ravaasj woor enorm!

Huub Velter

ZULVER 2008

De Zulvere Lambieck ging nao Huub Velter, de oeëverbuurmân van Rogstaekerpreens 2007 Ed Stroek. Bewoeëners vanne Vuuërstestraot en lede van vastelaovendjvereiniging de Wiepkes haaje zich hieël wat vuuërgenoeëme wi-j Ed Stroek woor uutgerope tot Rogstaekerspreens 2007. Same stoeëke ze de hang uut de mowwe um ‘t hoês vanne Stadspreens te verseere.

En zoeë woorte inne vuuërtuin oonger ângere twieë vlaggemaste geplaatsj. Vör ‘t plaatse van dieës maste móste gate waere geboeërdj innen hoeëf van ‘t preenselik peliês. Huub noom dieës taak op zich en maakdje gebroêk van ‘n stieëvige groondboeër. Wieëges ‘t ‘stôrmechtige waer’ in di-j periode woort besloeëte um e good deêp gaat te boeëre. ‘t Ieërste gaat woor zoeë geboeërdj. Geîn probleem.

Beej ‘t boeëre van ‘t twieëdje gaat ging ‘t mis. Van ‘t ein op ‘t ânger ougenblik kloonk d’r e schel fluitendj geluid en rook ‘t nao gaas. ’t Woor innegang dudelik det de gaasleiding woor geraaktj. Mét as gevolg det de brandweer mét toeters en belle binne înkel menute arrivieërdje, de plies effe later verscheen en geliêk begós mét de buurt aaf te zétte.

‘t Doordje uuteindelik ongerhalf oor vuuërdet de techniese deenst van Eneco arrivieërdje en in staot woor ‘t lek te verhêlpe en Rogstaekerspreens Ed I einigszins vertraogdj aan zien programma van dae daâg kos beginne.

Ed hieët de Zulvere Lambieck in ontvangst genoeëme, vör de helaas aafwieëzige Huub Velter.

Sjra Tullemans

BROONS 2008

Sjra kwoom aafgeloupe zoeëmer, aardig inne oeëlie, van ’t Aod Limburgs Schöttersfieëst aaf en haaj zin in ‘n Chinese riêsttaofel. Zien vraw Lies bracht ‘m nao e Chinees restaurânt en bleef zelf effe in d’n auto zitte terwiêl Sjra ‘t aete ging bestélle.

D’r gînge 5 menute vörbeej, 10 menute vörbeej en nao 30 menute zoog Lies almer geine Sjra trök kaome. Lies zoog op e gegaeve memênt zelfs minse nao boete kaome di-j völ later as Sjra nao binne wore gegânge. Dus ging Lies, nao ruum ‘n half oor wachte, toch mer ‘s effe kieke woeë eure mins bleef.

En jao, eînmaol binne zoog ze Sjra zitte. Mer Sjra zoot neet beej de aafhaalbalie. Neîn, hae zoot allein aan e schoeën gedéktj täöfelke mét ‘n Chinese riêsttaofel vuuër zich. Sjra woor zoeë zaat dette zien leef vraw, woeëmej hae al 40 jaor leef en leid deiltj, complieët woor vergaete.