Lambieckaovendj Archief

Marillewies Kneepkens en Wil Leenders

GOUD 2011

Ze gînge in 2010 nao ‘t concert van André Rieu oppe Vriêthof in Mestreecht. D’r woor völ raengel vuuërspeldj mer toch spuuëldje Rieu boete oppe Vriêthof in plaats van in ‘t Mecc. De gaste koste dus oppe Vriêthof van e fantasties optraeje geneête, mer woorte dus waal hérstikke naât. Zoeë ouch Marillewies en Wil.

Doeërweîktj vanne raengel kwome ze nao ‘t concert beej eure wage aan. Bang um verkaoje te waere, besloeëte ze eur nate klei-jer uut te doon. Dus woort de wieëg nao Wieërt ingezatte soonger de boeëvekleî-jer in ‘ne heerlik verwermdje wage. Hâlverwieëge woor d’r ‘n pliesiecontrole en neteurlik veel ‘t oug vanne plies op de wage van Marillewies en Wil. Tjèh, légktj det mer ‘s uut...

Erick Schreurs

ZULVER 2011

Erick, eigenaar van ES-Garagedeuren, hultj zich dageliks bieëzig mét ‘t levere en montieëre van garaasjduuëre. Zoeë woor Erick mét z’ne collega in 2010 op ‘ne raengelechtige daâg op wieëg nao ‘n klus woeëbeej ‘n garaasjduuër gemontieërdj mós waere. Erick, ouch neet van géstere, besloeët um zien bös inne garaasj te ri-jje. Lekker gemaekelik: druuëg en âl ‘t materiaol beej de hând.

‘t Woor effe passe en maete um de bus inne garaasj te kriêge, mer ‘t rizzultaat mocht d’r zeen. Heerlik druuëg gestânge en de klus woor binne ‘nen daâg geklaordj. Mer Erick haaj waal e probleemke want hae kos mét gein muuëgelikheid de bus oonger de now garaasjport doeër nao boete kriêge!

Hugo Zontrop

BROONS 2011

De verkânsietiêd woor aangebroeëke en Hugo zoeëj mét z’n hoêshaoje nao de Oeëstenriêkse Alpe gaon. De wage woort gelaje en ‘t jongste gezinslid woort doeër Yvonne, zien vraw, nog effe vuuër vertrék verschuuëndj. Nao ’n aantal ore gerieëje te hebbe rook de femilie Zontrop ‘n onaangenaam löcht. De beschûldjigendje vînger ging nao de jongste telg van ‘t gezin, dae d’rvan verdachtj woort in z’ne luier te hebbe gepoeptj. Dus wage aane kânt en effe checke.

Controle wees echter uut det d’r niks aanne hând woor en dus woort de reis voeërtgezatte. Mer de stânk woort almèr êrger en bekans neet mieër te harde. Aangekaome oppe bestumming woort de wage óngersteboeëve gedrejdj en waat bleek? Tiêdes ’t inpakke vanne wage haaj Hugo inne haost ‘ne plastic buul inne wage gezatte inne veróngerstêlling det dit verkânsiespulle wore. Laotj dit noow de plastic buul mét voel luiers zeen gewaesj dae Yvonne haaj klaor gezatte um wég te goeze inne kliko. Daomej és ‘t verhaol nog neet gedaon want nao twieë fantastiese verkânsiewaeke kwoom ‘t hoêshaoje Zontrop thoês en woort opnów oeëvervalle doeër ‘n onaangenaam geurtje. Naomaote ze wieter de wuuëning in lepe, woort de stânk sterker en sterker.

Einmaol inne garaasj aangekaome woort de oeërzaak innegang gevoonge: ‘t Woor Hugo dae in dezelfdje ‘vertrék-nao-de-verkânsiebestumming-haost’ de vergissing haaj gemaaktj um neet de stekker van ‘t wasmesjien, mer de stekker vanne deêpvrezer uut te trékke.