Lambieckaovendj Archief

Kees Buys en Frits Schonkeren

GOUD 2012

Waat woor ‘t gevâl? ‘ne Invalide mins in ‘ne elektriese rolstool stóng al ‘n hâlf oor op dezelfdje plaats vuuër de Kijkshop. De börgerplicht van Kees maakdje det hae in zien behölpzaamheid vroog of de mins probleme haaj en de accu van z’ne rolstool soms lieëg woor.

De béste mins wis ouch neet precies waatter aanne hând woor. Dus attênt as Kees és, waere d’r gein half maotregele genoeëme. Kees hieët ‘n bedriêfsbös vuuërhang en beltj ze schoeënvader Frits um ‘m te hêlpe. Kees haaj zich namelik al bedachtj det de rolstool aanne trékhaok hânge gein optie woor en ‘t höffe van ‘ne elektriese rolstool mét de invalide mins vör hem allein wat zwaor zoeëj zeen. Frits, ouch neet de beroerste, kwoom innegang. Toen volgdje de vraog woeë de mins nao tow gebrachtj mós waere: Kelpen-Oler, woeë hae woeëndje. Zoeë gezagdj, zoeë gedaon. ‘t Böske woort vuuërgerieëje en de mins woort mét stool en âl ingelaje. Um te vuuërkaome det de stool doeër de bus zoeëj schuûve, woort dieëze vastgereemdj. ‘n Hieël karwej.

Aangekaome op ‘t adres, woort d’n hieële hândel uutgelaje. Kees en Frits leêpe mej richting vuuërduuër, woeë ze tot de ontdékking kwome det de mins ziene hoêssluuëtel woor vergaete. Zien broor, dae ouch dao woeëndje, bleek neet thoês te zeen. Wat te doon? De buurvraw woort aangesproeëke en zeuj woor zoeë vrîntelik te zégke det de broor van de invalide mins waarschiênlik inne kefee zoeëj zitte. Dus de mins, de stool, alles weer de bös in, vastreême en dao ging ‘t gezelschap richting kefee. Aangekaome beej de plaats van bestumming woort d’n hieële hândel weer uutgelaje en dao ginge ze de kefee binne. “És heej ‘ne menieër Klaassen, de broor van Jan?” “Neîn, dae es zjuust vertrókke. Hae zâl waal aan ‘t rippetieëre zeen beej de fanfaar, beej de voetbalclub.” Dus opnów woort d’n hieële hândel ingelaje, vastgereemdj en de rit voeërtgezatte richting voetbalclub. E stök wiezer gewoeëre vanne ieërder opgedaon ervaring, ging Frits allein richting clubgebouw. D’r woort vôlop gerippetieërdj. Frits klopdje, zwejdje, reep, mer edereîn woor zoeë geconcentrieërdj bieëzig det Frits 10 menute mós wachte vuuërdet hae zien gevraogdje aandacht kreeg. “És heej ‘ne menieër Klaassen aanwieëzig?” En jao huuër, d’r wore d’r drej. Wi-j Frits aangoof de hieër Klaassen vanne Kêrkstraot te zeuke, woor de broor zoeë gevoonge.

“ Vae hebbe eure broor beej os. Hae hieët ‘ne lieëge accu en wiltj gaer thoês nao binne.” “Huh, accu lieëg? Thoês nao binne? Dat kân hieëlemaol neet. Hae woeëntj al zieëve jaor in ‘t Verpleeghuis Sint Martinus in Wieërt.” En dao stóng Frits mét zie good fatsoên. Trök nao Wieërt. Trök nao ‘t verpleeghoês. “Woeëntj heej ‘ne menieër Klaassen uut Kêlpe?” “Jao, vae zeen ‘m al e paar oor kwiêt. Hejjae ‘m gevoonge?” Woeë-op Frits en Kees zagte: “Jan, gae mótj heej zeen.” “Ao jao, det kloptj”, zieët Jan. Hae schakeltj ziene rolstool in en rietj mét volle accu zoeë nao binne...

Rolf Wiermans

ZULVER 2012

De stom streêk van Rolf Wiermans woort doeër de Lambieck Knoup via Youtube gesignalieërdj. Wi-j umschriefdje e filmpke? Neet. Vae kunne uch allein mer zégke det vae Rolf ri-jjendj op ‘ne zitmejjer, mét ‘ne zwiep de macht oeëver ’t steur zeen verleze en daodoeër zeen aafstevene richting ‘ne groeëte haard-plastic koepel... Op ‘t memênt det hae dao mét zitmejjer en al doeërhaer zaktj, bliêktj oonger dae groeëte koepel e mét water gevöldj zwumbad te zitte... Vör de geïnteressieërdje:
http://www.youtube.com/watch?v=3eEsp3V6PtE
of kiektj beej Youtube oonger ‘Valkenaars’. As dejjae ‘ne mins op ‘ne zitmejjer zeetj zitte, kujje de stom streêk van Rolf mét eîge ouge zeen.

Yvonne Greijmans

BROONS 2012

De Broonze Lambieck ging dit jaor nao Yvonne Greijmans, opgegruudj mét en jaorelânk wêrkzaam in ‘t bedriêf van eur vader, autobedriêf Greijmans. De bure vanne Broonze Lambieckwinnares wore op zeuk nao ‘ne wage. Laotj ze noow, nao zich wat georiëntieërdj te hebbe, super enthousiast rake oeëver ‘ne wage beej vuuërneumdj autobedriêf. ‘n Proofrit woor dus ‘n logies gevôlg. Heejvör móste ‘n dael wages waere verplaatsj en vervôlges rieëj Yvonne de wage van eur goesting nao boete: boem... paaf... finaal tieëge de etalaasjroêt aan. ‘ne Slaâg van jewelste en de roêt in 100.000 stökskes. Einig idee wi-j groeët zoeë’n roêt és? Normaal waere d’r päölkes boete wînkels gezatte um ramkrake te vuuërkaome.

Noow haaje ze di-j baeter binne kunne plaatse. Doeër alle konsternâsie schrok Yvonne zoeë hieëvig det eure voot vanne rem schoeët en de wage nog ‘n maeter wieter rieëj. Dus di-j 100.000 stökskes veêle mét ‘ne vôlgendje slaâg oppe groond. Fietsers di-j vörbeej kwome schrokke zich kepot (zjuust wi-j de potentieël kuîpers en vader Greijmans) en mótte ongetwiêfeldj gedachtj hebbe detter ‘nen oeëvervâl plaats vóng. Ein signifikânt detail: de wage kwoom d’r woongerbaarlik genóg mét e paar nauweliks zichtbaar schremkes vanaaf en és gekochtj doeër eur bure...

Dus wurtj Yvonne nog dageliks herinnerdj aan eur stom streêk.