Lambieckaovendj Archief

Marco Vaessen

GOUD 2015

De stom streek van Marco Vaessen woôrt beloeëndj met de Gouwe Lambieck.
Waat woor d’r gebuuërd?

In verbând met ’t definitief aafstumme van de gepléndje zoeëmervekânsie woôrt d’r ‘ne lekkere barbecue gehaoje met Opa, oma, Marco, Chantal en dochter Fay.
‘t Woor êrg lekker waer en vör de gezelligheid haaj Marco ‘ne boetehaard op taofel gezatte.

Dao kwoom ‘n klein bitje wêrmdje vanaaf, mer vörâl goôf ‘t völ gezelligheid op dieëze soeëmerse aovendj. Det smaakdje nao mieër. Dus leek ’t Marco leuk um ouch ‘ne Zweedse fakkel aan te staeke. Marco ging d’rmej aane slaag, mer nao 15 minute woor d’r nog steeds gein veur. Dét mós op ’n ânger meneer toch baeter gaon.

Marco zoeëj dae fakkel waal ’s efkes hêlpe met wat bio-ethanol waat hae ouch gebroeëktj haaj vör de boêtehaard. Fay haaj al ’n paar kieër tieëge heûr vader gezagdj det dit toch écht gein good idee woor, mer jèh, eigewiês is ouch wiês! Vôl oeëvertuuging ging Marco met de fles bio-ethanol aane slaag. Met z’ne doem gedaeldjelik op de oeëpening vanne fles besproeidje hae de Zweedse fakkel. Helaas goof det gein verbaetering.

Marco bedacht zich gein momênte en prebieërdje ’t nog ‘s. Allein noow zónger de doem op de oeëpening vanne fles. En inderdaad det bleek baeter te wêrke, allein… D’r ontstóng ’n staekvlam van bekans 3 maeter en de fles di-j Marco nog steeds in z’n háng haaj vloeëg doeër de löcht inne richting van de bure!!!

De schrik zoôt d’r good in, mer gelökkig woor d’r niks ergs gebuuërdj, teminste det dachte ze. De gedachte woor nog neet uutgesproeëke wi-j Fay kaakdje: “De kniên stieët inne fik!!” Doeërdet de vlam in de fles woor geslaage, woor de hieële bio-ethanol oeëver de groondconifeer en de kniên gekaome.

Zónger wiêter nao te dînke kwoom Marco in aksie. Hae sprong oeëver ’t hekske um de kniên te pakke. Det lökdje neteurlik neet in eine kieër. De kniên, al burrendj, vloeëg z’n hok in waat vôl loog met zaegsel en hoeëj. In paniek trok Marco de deksel vanne koeëi oeëpe en zoog de kniên in z’n slaophok zitte.

Nao ’n paar kieër met z’n hang ’t veur te hebbe wille douve, pakdje Marco de nog burrendje kniên uut zien hok um ’t veur al rollendj uut te kriêge. Mer ouch det lökdje neet. Gelökkig woor ’t Fay di-j op ’n good idee kwoom: “Goezj de kniên in ’t zwumbad!” En det woor de redding vör Nijntje de kniên.

De femiêlie dach ’t êrgste waal te hebbe gatj, mer nog gein seconde nao dieës redding kaâkdje opa: “De struuëke staon inne fik!”En inderdaad uut de groondconifere kwoome vlamme van zoeë ‘n 3 à 4 maeter. Marco kós met ‘ne eimer water en de tuinslang ’t veur douve. Ederein woor uutgeblusj, Marco zellufs letterlik.

Z’n háng woore flînk verburdj en de kniên haaj gein snorhaore en wîmpers mieër. Ouch woor Nijntje aane rechterkânt flînk verburdj, zoeëwaal zien vacht as zien oeëre. Met de vacht van Nijntje ésj good gekaome, mer ‘t oeëvergebleve hâlf rechteruuërke zâl vör altiêd ‘n bliêvendje herinnering zeen aan ‘ne uut de hând geloûpe barbecue.

En de koste van de vieëarts………..daovan haaj Marco gemaekelik 20 now kniên kunne koûpe!!!

Heinz Meuwissen

ZULVER 2015

Heinz Meuwissen woôrt met zien stom streek beloeëndj met de Zilvere Lambieck.

Heinz haaj al jaorelânk dezelfdje autoe. Nao jaore van trawwe deênst, nao ‘t rake van de noeëdige päölkes, met wat deukskes, krasse en ânger reparâsies woor dieëze autoe toch écht aan vervânging tów. Heinz rieëj al langere tiêd ‘tzelfdje mêrk autoe, mer woor noow toch serieus aan ‘t oeëverwieëge um te wissele van mêrk. Dus ging Heinz haard op zeuk.

Nao wat proefritjes, de noeëdige bezeukskes aan de graazjes en de discussies met zien vraw Gertie woor de kuuës gemaaktj. Heinz bleef beej ‘tzelfdje mêrk, ‘tzelfdje type allein dan in ‘n now uutveuring. Jao, Heinz dae héltj waal van verângeringe!

Nao ‘t beântwoeërde van de léste kritische vraoge van Gertie, kos Heinz ziene nowwe staole ros gaon bestélle. Nao ’n paar waeke wachte woor ’t uuteindelik zoeëwiêt: de nowwe autoe kós opgehaaldj waere. Vör manne ‘ne zieër belangriêke mer ouch spannendje daag. ’t Ophale ging prima. Daonao ’n lekker ritje nao hoes, woeë Heinz de autoe hérstikke gruuëts de oprit oprieëj.

Zieër tevrieëje leep hae ’n paar rúntjes um de auto en saoves leêt hae ‘m ouch aan zien dochters en schoeënzuuëns kiêke. Neteurlik mos d’r ouch ’n ritje gemaaktj waere. Daovan toês gekaome woôrt d’n autoe inne graasj gezatte vör de nacht. Det woor ’t plan teminste.

Hieël vörzichtig rieëj Heinz de autoe de graasj in. Dieëze ieërste kieër mós hae neteurlik extra good oplétte, dus stapvoôts, bitje beej bitje rieëj hae d’n autoe vuuëruut. Alles ging prima tot d’n autoe zjuust vörbeej de vuuërwiele binne stóng. Heinz haaj ‘n probleem! D’r woor namelik hieëlemaol gein ruuëmdje mieër naeve de speêgels. Stêrker nog, de autoe pazje hieëlemaol neet inne graasj!

De nów uutveuring van de autoe woor ‘n stök brèjjer, woeëdoeër de graasjport te klein woor. Met ‘t noeëdige geknoeëter mós Heinz aan Gertie gaon vertélle det de nowwe autoe neet inne graasj pazje. En dan moog d’r geraoje waere waat de léste vraog van Gertie woor vuuër Heinz nao de graasj vertrok um de autoe te bestélle: “Ich neem aan det dae nowwe autoe ouch in de graasj pésj?”

Uuteindelik és de autoe gebleve en hebbe Heinz en Gertie besloeëte de graasjport te vervânge. Dus noow hieët Heinz ‘ne schoeëne, groeëte , nowwe autoe dae hae edere daag met gemaak in zien graasj met ‘n now, brèjjer graasjport kân zétte.

Yvonne Snijders

BROONS 2015

De Broonze Lambieck ging dit jaor nao Yvonne Snijders.

Aafgeloûpe jaor woore Yvonne en heûre mins Thijs same met heûr twieë wichter op vekânsie. Dik en dubbel verdeêndj nao ‘n jaor haard wêrke. Eînmaol heerlik gesetteldj oppe camping zeen ze ‘ne bekindje autoe vörbeej ri-jje.

De oeëverbure zoeëje in dezelfdje periode op dezelfdje camping staon. Neteurlik woôrt d’r drek aafgesproeëke um d’r same ‘ne daag op uut te trékke met de twieë hoêshaojes. Same gaon ze ‘n plaats bezeuke in de buurt woeë op dae daag ‘ne groeëte mêrrentj zoeëj zeen.

‘t Woor dus hértstikke drök en ‘n parkieërplaats vînge és dan hieëlemaol neet gemaekelik. Zieëker neet ‘n parkieërplaats woeë allebej de autoes geparkieërdj kunne waere. Mer uuteindelik woôrt d’r ‘n plekske gevónge, waaliswaor ‘n hieël indj van de mêrrentj aaf, mer dét móch de pret neet drökke. Op dieës parkieërplaats mós uuteraard ouch betaaldj waere. De oeëverbure haaldje ‘n parkieërbon en lagte di-j achter de vuuërroêt.

Yvonne staptj ouch uut en gieët op wieëg um ‘n bönneke te hale. Ederein kintj de situâsie waal. Op ‘n boetelandse parkieërplaats zuuët alles d’r zjuust wat ângers uut as heej in oeës vertrawdje Wieërt. Behâlve dan al di-j autoes met ‘n Hollendjs kentaeke di-j ouch dao in de mieërderheid woore.

Yvonne luîptj nao de dichtstbeejzeendje autoemaat woeë nemes beej stieët en doétj dao kleingêldj in. Zich óngertösse aafvraogendj woeërum de ânger Hollanders in ’n ri-j bliêve staon vör dae ângere autoemaat. Ze staon te wachte, mer d’r keumtj gein bönneke uut. Yvonne paktj nog wat kleingêldj en doétj ouch det gêldj in de autoemaat. Mer nog steeds gein bönneke! Yvonne drejtj zich um richting autoe en zuuët det Thijs zjuust uutstaptj.

Ze gebaartj en kaaktj oeëver de parkieërplaats: “D’r keumtj hieëlemaol niks uut de autoemaat!” Ederein dae op det momênt op de parkieërplaats és drejtj zich um nao Yvonne en bliêve kiêke. Thijs keumtj gaw Yvonne ’s kânt opgeloûpe um heûr te óngersteune. Al knoôterendj bereiktj Thijs Yvonne: “Dich zuls waal weer neet good gekeêke hebbe!” ‘t Deurdje neet lang tot Thijs de oeërzaak gevónge haaj.

Yvonne haaj al heur kleingêld neet in ‘ne parkieërautoemaat gedoédj, mer in ‘ne condoomautoemaat!!! Einmaol ‘t besef det ze beej ‘ne verkieërdje autoemaat stóng, és Yvonne met ‘ne roeëje kop (mer zónger condooms) nao ‘ne parkieërautoemaat geloûpe en dao asnog ‘n bönneke gehaaldj.