Lambieckaovendj Archief

Maud van Erp

GOUD 2018

De pap en mam van Maud zeen groeët gewore met Den Deutsche Rundfunken, wi-j Sendung mit der Maus, Pumukl und Meister Eder, und naturlich Tutti Frutti op RTL Plus. Met ’t kieke van dieës programma’s hebbe ze dan ouch de noeëdige Duitse wuuërd en oetspraoke gelieërdj.

Zeuj waal, mer dochter Maud es van ’n anger ginnerasie en hieëf minder Duitse wuuërd van Den Deutsche Rundfunken mejgekrieëge.



Maud werrektj in de frietkraom beej de Wieërterbergen en as dejjae unne Pruus zeuktj, dan kijjae ‘m dao veenge! Pruuse staon d’r namelik um bekîndj op ziene tiêd gaer ’n bruuëdje worst te aete. En dan mojjae dao dus beej Maud zeen!

Unne Duitse menieër keumtj binne beej Maud en zieët: “ich möchte gerne ein Brötchen mit Wurst, bitte”. Jao, neteurlik mojjae dao in biete dacht Maud noch, mer tiggeliekertieêd deenktj Maud beej d’r eige: “das ist noch kein Problem, das verstehe ich noch waal”. Dus Maud zieët trök: “ein Brötchen mit Wurst, kein problem.” Toch vruuëgtj dae Pruus zich op det memênt nog effe aaf woeë di-j worst dan van gemaakt zoeëj zeen, dus hae vruuëgtj aan Maud: “Fraulien, können Sie mir bitte sagen von welches Fleiss die Wurst gemacht is”? Dju, deenkt Maud, ich weit det ’t vêrkesvleis es, mer waat es dao ouch alwieër ’t zjuuste Duitse woeërd vör?

Maud twiefeltj en luiptj effe nao unne collega, mer ineins veltj ’t binne. Maud drejtj zich um en luiptj zoeë zieëker as wat richting dae Pruus en gruuëts wi-j ’n pâw met zieëve sterte zieet Maud: “Schwanz”!

Dao Pruus deenktj; ich geluif ich huuër neet goot en vreugtj, “wie bitte”? Maud meintj det dae Pruus wat aan ziên oeëre mankieërtj dus noch waat haarder schriewtj ze doeër de zaak: “SCHWANZ”!

Dae Pruus hieëf toen ziên bestelling mer aafgezagdj…


De Spoeëkejaegers

ZULVER 2018

Vae schrieëve zaoterdig 18 fibberwari. De aovendj van de receptie van de Landhieër en de Jeugdhoeëgheid van de Schaöpkes. Völ vereiniginge trokke dan ouch richting ’t Groenewoud um de hoeëghede te kaome fillesetieëre. Met de beîn boete en knoepe gezellig! Waat woort dao gefieëstj en getempieëstj zègk! Det mos bekâns wis aan Zwertbrook te huuëre zeen gewaesj.





Oeëver Zwertbrook gesproeëke: de Spoeëkejaegers haaje vuuërig jaor ’n fantastisch jeugdpreensepaar in Jeugdpreens Jay en Jeugdpreenses Christy. Echte fieëstnaaze! Jeugdpreens Jay dae ging dan ouch vuuërop in de polonaise op al dae sjieke vastelaovendjmeziek. Wat meug in de beîn vong hae ’t tieëd um unne pitstop te make beej de staontaofel van de Spoeëkejaegers vör ’n glaeske limmenaad en wat te snuike. Dao aangekaome trof hae ’n lieëg taofel. Woeë es os mam? Woeë es mieën Jeugdpreenses? Ouch huuërdje hae de Spoeëkejaegerskepel nerges mieër spuuële. Dan zal dit waal de verkieërdje taofel zeen dacht Jay en hae trok wieter de zaal in, op zeuk nao zien eigeste Spoeëkejaegers.

‘t Waas holle klot in de bus trök nao Zwertbrook. Met twieë bösse vôl woore ze nao ’t Groenewoud getooge um dao ’n geweldjige receptie beej te woeëne. D’r woort noch fleenk naogekaltj in de bus en beej Café Plexat woorte de vate al aangehâwdj want d’r ware twieë bösse vol Spoeëkejaegers trök op wieëg nao Zwertbrook. Det wuuërtj bâl! ’t Mot erges beej aankomst in Zwertbrook zeen gewaesj det d’r zich eemus aafvroog woeë Jeugdpreens Jay eigelik waas. Det mot ouch ’t memênt zeen gewaesj dat Jay nao boete luiptj op ’t Groenewoud en twieë bösse minder teltj oppe parkieërplaats. De Spoeëkejaegers woore vertrokke, zonger eure eigeste Jeugdpreens Jay.

En as dejjae uch noow aafvraogtj of det menneke noch waal thoeës es gekaome? Neteurlik! Dao hebbe vae in Wieërt de Zweeloeëre vör.

Namens de Spoeëkejaegers, unne dikke merci dao op Luuëke!


Rens van Erp

BROONS 2018

Aafgeloupe jaor waas Rens van Erp, baeter bekindj as De Witte, Preens achter de Tunnels beej De Verkusköp. As Preens in ’t Wieerterland, en dus ouch as Preens van Zuid, gaojjae met eur preenselik gevolg nao ’t Preensetreffe. Want det huuërtj zich zoeë. Aafgeloupe jaor vong dit Preensetreffe op Bosseve plaats. ’t Preensetreffe spuueldje zich aafgeloupe jaor aaf binnen un Italiaans thema. Doeer de organizieerendje vereiniging es goot gezörrigdj. De aanwieezige Preense met eur vereiniginge waane zich op ’n echt Italiaans bal masqué. Op zoeë un bal masqué woeë ’t beer, mer ouch de limoncello, geweldjig smaaktj.


Op dieeze aovendj kriegtj eedere Preens de kâns zich op de zjuuste meneer te prizzentieëre aan de boetewerreldj. Eedere Preens wuuërtj geïnterviewdj en vuuërgesteldj aan alle Wieërter mînse. En des best spannendj! Alles wuuërtj op bieëldj vastgelagdj vör un tillevisieregistratie dus ’t belang van dieeze aovendj moog zieeker neet ongerschatj waere. Gae kriegtj mer ein kans, en gae motj d’r inne gang tegooj op staon!

Wi-j dejjae uch vuuer kintj stelle esj hieël belangrieëk um, zjuust dao, eur orde en devies good uut eure bol te kinne. Rens haaj zich dao wat zieenewechtig oeëver gemaaktj mer haaj goot geoefendj, det mot gezagdj! Ouch op de aovendj zellef haaj hae mieermaols zien devies en orde herhaaltj want di-j vanne tillevies haaje écht gezagdj detj d’r in eine kieër op mos staon. In eine kieër, dus gein herkansing.

Alle vereiniginge kwoome ein vuuër ein aan de buuërt um vuuër de camera te verschiêne en bekans as letste, nao veer oor wachte, woore dan eindelik de Verkusköp met Preens Rens aan de buuërt. Dus ouch veer oor beer en limoncello dreenke wieter. Rens haaj opeins hieel gein last van zieenewe mieer. Di-j zieenewe haaje plaats gemaaktj vör unne angere geistelik tôwstand. Laote vae ut aangeschoeëte neume.

Rens trok van laer en het interview ging hertstikke goot. Wi-j ut huuertj wuuertj aan Rens gevraogdj um aaf te sloete met zien devies. Now mojjae weite det Rens un paar jaar trök ouch oeets Preens beej de BBC es gewaesj, un wat minder nette club as De Verkusköp, woee de schaele zeiver regieertj. “En Rens, onger waat vuuer devies gaojjae de vastelaovendj vuuer op Zuid?” Van Erp haaltj aom, zetj zich schrap, smieërtj noch eine kieër de kael met ’n slökske limoncello, en kaaktj…

“Dre-j daag schêrp met de sesiês van Van Erp!”