Waat és de Lambieck Knoup?

De Stichting Lambieck Knoup Wieërt és opgerichtj in 1979. De Lambieck Knoup prizzentieërtj jaorliks oppe maondjigaovendj vuuër de vastelaovendj tiêdes de Lambieckaovendj de 11 meist ludieke vuuërvalle van ’t vuuërgaondje jaor. ’t Gieët dan um gebuuërtenisse di-j in ieërste instântie serieus zeen bedoeldj mer op ’n ongeplendj hilariese wieze uutpakke.

De meist spraokmakendje missers waere bekroeëndj mét de Gouwe, Zulvere en Broonze Lambieck. De Lambieck Knoup buigtj zich jaorliks oeëver zoeë’n 40 tot 50 missers en blunders di-j zich in ‘t vuuërgaondje jaor inne gemeindje Wieërt en Ni-jwieërt hebbe aafgespuuëldj. D’r moog geîne opzét in ’t spuuël zeen. En zieëker zoeë belangriêk: de betrokkene motte d’r achteraaf ouch zelf hertelik mét kunne lache. Zelfspot en ‘nen houp humor spuuële heejbeej ’n belangriêke rol.

Ouch reiktj de Lambieck Knoup vanaaf 1990 bekans jaorliks ’ne Ieëre-Lambieck uut. Dieës óngerschei-jing wurtj uutgereiktj vör ‘ne blunder dae zich boete Wieërt en Ni-jwieërt hieët aafgespuuëldj, mer waal inne provincie Limburg. Det moog en kân zoeëwaal Bêls as Nederlands Limburg zeen.

Tot slot zette ve jaorliks emes in ’t zunke dae zich songer einig belang en oppe achtergroond inzétj vör de Wieërter samelaeving en cultuur. Dieëze persoeën kriegtj vör âl zien of heur verdeenste de Jan van der Croeën-Ieëremedalie.

De waopespreuk van de Knoup és:

"Aliquando et Insanire, Jucundum est."

     (" ‘t És bést lollig um ’ne kieër ‘t kaof te zeen ")